Peranak Rumah Stie, Bayong minta jalai nuju rumah panjai sida dikemanah tang enda dikeibuh
SARIKEI: ‘Lima taun pengudah jalai kampung tu dikemanah ari jalai ke semina ulih endur bedarat aja nyadi jalai besai ke dilipan, nyentuk ke sehari tu, nadai sekali pan jalai nya kala dikemanahka orang ti dikearapka ulih mantu rayat’.
Sebana tu dikenataika 100 iku peranak Rumah Stie, Nanga (Ng.) Bilak Dua Sungai Bayong, ditu madah ngagai media, empai lama ke udah.
Ku sida, taja pan beberapa kali sida udah bejaku sereta nulis surat nuju raban ke bekaul, tang nyentuk ke sehari tu lalu nadai ninga timbal ari sida.
Seiku peranak menua nya, Stevenson Unggai Ubong, 37, madahka, diatu bisi 3 kilometer jalai nya jai, tauka 70 peratus.
“Taja pan diatu, hari panas tang jalai nya mar ditengah kerita bukai kelimpah ari kerita 4WD.
“Jalai nya belubang sereta bearung laban ujan maya bulan November, Disember enggau Januari tu tadi.
“Ngelama tu, peranak menua udah nguji mutarka penanggul nya nyengkaum ngemanahka jalai nya nengah chara beripai ba endur ke udu jai, ngena tulang empat kerat naka ke ulih dikereja kami,” pia ku Stevenson.
Taja pia ku iya, jalai nya majak balat jai sereta begunaka belanja besai kena ngemanahka jalai nya ti enda ulih ditangkup kami.
“Tebal agi kami ke nguan kandang menua tu gawa bekebun, bumai sereta bekuli aja kereja kunterik. Jalai nya ke jai balat udah ngenusahka kami, laban semina seiti jalai nya aja ke bisi ditengah peranak menua tu pansut tama kelebih agi berangkutka asil tanam sereta nurun gawa ke pasar.
“Lebuh maya musin ujan tu tadi, jalai nya enda enda ulih ditengah kerita enggau mutosikal sekali. Nya ngujungka kami bedarat enti deka mulaika diri ke rumah tauka nurun ke pasar.
“Maya nya, kami bedarat nurun sereta nanjak bukit nyauka sejam enti deka pansut tauka nurun ngagai palan ke deka dituju,” pia ku Steveson.
Ku Benedict Chan, 25, ba runding iya, nya mandangka sida dia agi jauh tinggal ari semua pekara pemansang enggau perengkaguna baka ke bisi ba endur bukai.
“Penanggul tu ngenusahka peranak menua ditu. Dalam timpuh lima taun, kami ngasaika diri enda dikeibuh laban penanggul tu lalu enda teputar.
“Mayuh sebana udah dikenataika kami sekalika nya nengah jaku tauka betulis, tang tetap enda dikeibuh. Dalam ati kami suah betanya, ni meh maya penanggul tu teputar laban kami endang ngarapka ubah sereta bantu kena mutarka penanggul tu,” ku Benedict.
Ku iya baru, ketegal nya mega udah beberapa kali peranak menua nya enggau orang ari luar ke nengah jalai nya bebadi kelebih agi maya hari ujan tauka mai barang ke berat.
“Taja pia, nadai kala bisi nabanka nyawa naka ke diatu,”pia ku iya.
Rumah panjai Setie nya ba Jalai Bayong, urung 25 kilometer ari pasar Sarikei.