KENA BERATIKA PENEMGKEMAN SUPP: Chairman pengatur pengawa, Ting (dua kiba) meri penerang ba aum pengarang berita ditu.
KUCHING: Padungan Youth Movement (PYM) begulai enggau Kuching Youth (KY) deka ngatur sebengkah pejurai penemu bepelasarka ‘The Relevancy of SUPP’ bulan March tu ila.
Chairman pengatur pengawa, Ting Wei Tzen madah forum nya ila deka meri penau ngagai raban penyereta senentang gaya politik nengeri Sarawak maya ke diatu.
“Forum tu ila deka bejuraika gaya politik ke nyadi baka ke diatu kelebih agi ba kandang endur ke dikuasa tauka diperebut SUPP.
“Forum tu ukai semina dibuka ngagai raban bansa China aja tang mega meri awak ngagai bansa bukai bela nyereta ke alai kitai nyadang sekeda pengari rayat (YB) deka ngulu atur pengawa nya,” ku iya ba sebengkah aum pengarang berita ditu, Hari Empat tu tadi.
Forum tu deka ngangauka sekeda raban professor ke landik ba pekara politik nyengkaum ari Universiti Malaysia Sarawak (UNIMAS) ke dipilih nyadi moderator.
Ting nyadang enda kurang ari 500 iku penyereta dipelaba ngulu forum ke dibuka ngagai raban orang politik, nembiak sekula enggau mensia mayuh.
“Forum tu ukai diatur ketegal politik lalu enda bejaika sesapa kelimpah ari ti nyeliahka pekara agama,” ku iya.