Abis nadai seiku ari raban nya dichalunka nyadi pengari parti ba PRN Ke-11
KUCHING: Wanita Parti Demokratik Progresif Sarawak (SPDP) ngarap sereta minta abis nadai seiku ari raban indu dichalunka nyadi pengari parti nya ba Pengawa Bepilih Besai Nengeri (PRN) Ke-11.
Ketuai Wanita SPDP, Datuk Chiew Yen Chew madahka diri arap bendar sereta ngenukuka raban tauka pengari indu ulih ngenegap sereta ngeringka parti.
Iya madahka raban indu ukai semina ulih ngereja pengawa dalam ekonomi sereta sosial tang mega dalam dunya politik.
“Dalam parti, Sayap Wanita bisi pemereti ati ti manah, tang kami bisi juluk ati, kami deka nyapai juluk nya, kami deka ke ari raban indu nyadi pengari tauka chalun abis nadai seiku, ba PRN ila.
“Kami udah berengkah bejalaika pengawa sereta deka chakah gawa enggau bala ketuai parti ngambika ulih negapka agi penuduk dalam PRN ila.
“Mayuh kaban indu SPDP ti bepengelandik tauka bepenemu, tang naka ke diatu kami bedau ulih madahka sapa bagi chalun indu nya lalu enda ngira dini sitak ke diarika sebedau dikemendar parti, asal aja abis nadai seiku chalun indu ba PRN ila,” ku iya.
Chiew mansutka pekara nya dalam aum pengarang berita pengudah nyadi Chairperson Aum Exco Wanita SPDP ti diatur ba Indu Opis SPDP di Jalai Badaruddin ditu, kemari.
Nitihku iya dalam aum nya raban Wanita SPDP udah mutuska deka chakah ngatur mayuh program begulai sereta betemu enggau rayat berengkah ari bulan March nyentuk sepemanjai taun tu.
Parti SPDP ba pengawa bepilih nengeri diungkupka lapan sitak iya nya Tasik Biru, Pakan, Meluan, Bekenu, Marudi, Batu Danau, Ba’Kelalan enggau Krian.
Kelimpah ari nya Chiew mega ngarapka mayuh agi raban indu ari SPDP diberi peluang sereta diambi gawa dalam opis kepala menteri.
“Diatu kitai meda majak mayuh orang indu nitih pengawa politik ari komponen parti bukai.
“Nya alai kami amat ngarapka bala ketuai parti ulih meri pekara ti dipinta kami lebuh sida milih chalun pengawa bepilih ila, abis nadai seiku chalun indu.
“Nambahka nya, naka ke diatu semina seiku aja ari Wanita SPDP nyadi sekretari politik, nya alai kami minta seiku agi ari Wanita SPDP dipilih nyadi sekretari politik,” ku iya seraya madahka Kijan Toynbee ari sayap Wanita SPDP ti nyadi Sekretari Politik ngagai Kepala Menteri.
Berebak enggau nya Wanita SPDP meri pengaga ati ngagai Tan Sri Datuk Amar Adenan Satem ti dichirika nyadi Kepala Menteri Kelima Sarawak sereta beterima kasih ngagai Pehin Sri Abdul Taib Mahmud ti mujur ngiring menua sepengalama 33 taun udah nyadi kepala menteri.
“Kami begunaka sukung bala ketuai BN sereta Kepala Menteri baru ngagai peminta kami ti deka bisi pengari rayat indu,” ku Chiew.
Nitihku Chiew naka ke diatu serata Sarawak bisi 40,000 iku kaban Indu SPDP.