KUCHING: Sarawak agi betapi enggau suntuk lutur pakar ngeli taja pan sepital di nengeri tu ngembuan kereban perubat ngeli ti chukup.
Menteri Muda Pengerai Mensia Mayuh, Datuk Dr. Jerip Susil madah, enti dibandingka enggau Semenanjung Malaysia nengeri tu agi jauh tinggal ti semina bisi 15 iku pakar dalam bidang nya.
“Suntuk pakar ba bidang nya (ngeli) endang penanggul besai kitai. Nyauka tiap kelinik pakar sepital betapi enggau penanggul tu lalu atur pengawa deka nambahka penyampau pakar nya berat amat ba kitai.
“Di nengeri tu, Opis Menteri Pengerai bisi kereban ortodontik di sepital, tang penanggul iya kitai enda chukup lutur pakar, ambika banding di Sepital Bintulu.
“Lutur pakar mega endang amat diguna lebuh kitai deka nambahka kereban baru di sepital di mengeri besai dalam nengeri tu baka di Sibu,” ku iya.
Pekara nya dipadahka Dr. Jerip ngagai pengarang berita pengudah bejadika Kongres Pergigian Borneo Ke-4 ( ti diatur 22 ngagai 23 Februari) di Hotel Pullman ditu, kemari.
Nitihku iya, penyampau lutur ortodontik di Sarawak enggau Sabah agi jauh tinggal iya nya seiku lutur sama enggau 9,000 pesakit (1:9,000), ke patut iya seiku lutur sama nenggau 1,000 ngagai 3,000 pesakit (1: 1,000-3,000).
“Kitai (perintah) nemu mayuh pekara ti patut dipejalaika dikena ngangkatka status pengerai ngeli di Sabah enggau Sarawak.
“Enti disimpulka, bekaul enggau pengerai ngeli kitai agi tinggal di belakang Semenanjung Malaysia, taja pia kitai meri terima kasih ngagai Opis Menteri Pengerai Nengeri enggau Gerempung Ukai Dikuasa Perintah baka Gerempung Lutur Ngeli Malaysia (MDA) Zon Timur laban ti bebendar ngerapitka takah nya,” ku iya.
Dr. Jerip madah, kerejasama entara MDA enggau Jabatan Pergigian di Sabah enggau Sarawak meri pangka ti manah ngagai perintah ti bebendar ngangkatka pemanah pengerai ngeli.
Nengah kerejasama nya ulih bekunsi kereban sereta bejalaika macham projek taja pan betapi enggau penanggul ungkus enggau pengereja pengawa ti enda chukup, ku iya.
Kelimpah ari nya lebuh ti ngenang Kongres nya Dr. Jerip ngarapka raban pesereta nguna peluang nya nambahka pengelandik enggau penemu dalam teknologi ti bekaul enggau perubat ngeli.
“Ba kongres tu kitai ukai semina bekunsi peneleba enggau penemu sereta nambahka pengelandik tang mega bisi pemeri licha anatarabansa baka ari Taiwan enggau India kelimpah ari Malaysia.
Ba pengerami nya Dr. Jerip ngarika MDA nyuaka chek sepenyampau USD1,000 ngagai Persatuan Bagi Kebajikan Kanak-Kanak Terencat Akal Sarawak (PERKATA) enggau Persatuan Autistik Kuching (KAA).
Sama bisi ba pengerami nya, Direktor Pengerai Nengeri Datu Dr. Zulkifli Jantan, Presiden MDA Dr. Neoh Gim Bok, Chairman MDA Zon Timur Dr. Leong Kei Joe enggau Chairman Pengatur Kongres Dr. Nurshaline Pauline Kipli.