KUCHING: Sekeda ketuai dalam Parti Progresif Demokratik Sarawak (SPDP) ke udah ningkilka diri dipeda sedia berunding, ku presiden Tan Sri William Mawan.
“Engka pengudah sida ningaka jaku ansak ari kepala menteri enggau menteri besai ti minta penyarut dalam parti diputar ungkup pemaik serakup Barisan Nasional (BN).
“Raban ketuai SPDP ke diatu sigi ngelaluka jaku ansak ari kededua ketuai tinggi perintah BN sereta mega ari kepala menteri ke baru tu ila, Tan Sri Adenan Satem ke alai kitai diatu udah mungkal chara dikena mutarka pekara nya.
“Kitai enggai nyadi enda berunding, nadai chara bukai agi,” ku iya lebuh dikerandau pemberita pengudah pengawa nerima enggau nyua tanda midul Emas nyerumba pengerami 100 taun penumbuh Pengakap di Nengeri Sarawak, kemari.
Mawan ke mega Menteri Kanan madah SPDP ke nyadi sebengkah parti dalam serakup BN ngenukuka penyarut diputar ungkup pemaik enggau penegap BN.
Ku iya, kelaungka pengingin ati diri, kitai ke nyadi ketuai patut berundingka pekara tu lalu diperunding ngagai ikas ke pemadu manah.
Ditanya sekalika parti deka nerima baru lima iku pengari rayat ke udah ningkilka diri, Mawan nyaut: “Engka kitai nerima, kitai udah nempuh penguji tauka penanggul disiplin dalam parti. Nya meh kebuah kitai ngembuan konstitusyen dalam parti, enti seseiku kitai ngelanggar disiplin sida deka diukum nitihka atur ke bisi ditetap ba dalam konstitusyen.
“Parti udah ningkilka sida, tang kaban ke ditingkilka mega diberi awak ngapil nitihka konstitusyen parti tauka minta masuk nyadi kaban baru.”
Iya ke mega ADUN Pakan enggau MP Saratok ngelalau semua kaban enda ngingatka pekara ke udah nyadi lalu berengkah berundingka chara sida ulih nyaup ngenegapka parti lalu mansang ke mua.
SPDP berengkah napi penyarut maya pengawa bepilih dalam parti taun 2009.
Lima pengari rayat SPDP, ADUN Tasik Biru Datuk Peter Nansian, ADUN Bekenu Rosey Yunus, ADUN Batu Danau Paulus Gumbang, ADUN Marudi Datuk Sylvester Entrie enggau MP Mas Gading Datuk Tiki Lafe enda setuju enggau pemutus bepilih maya nya.
Ba bulan Januari 2010, sida lima ngemansut diri maya aum kunsil besai parti pengudah parti nyiri Nelson Balang Rining nyadi Sekretari Besai lalu Entrie dichiri nyadi mandal presiden.
Berengkah ari maya nya, sida lima enda kala datai aum ke diatur parti enggau pengawa ke diatur parti.
Ba pengawa bepilih parlimen 2013, Tiki bediri ngatika diri ngelaban chalun baru SPDP-BN Anthony Nogeh tang iya (Tiki) alah.
Bedau lama tu tadi, Kepala Menteri Pehin Sri Abdul Taib Mahmud sebedau ngelengka pangku pengawa ngansak parti dalam serakup BN nengeri ti bisi napi penanggul nyengkaum SPDP mutarka penyarut sida sebedau pengawa bepilih nengeri ke deka datai.
Jaku ansak nya mega disukung menteri besai, Datuk Seri Najib enggau kepala menteri ke baru, Adenan Satem.