Anda di sini

NBOS nengah GTP enggau ETP ngemeratka rayat

Advertisement

SRI AMAN: Kena ngemujurka juluk ati perintah ngemeratka rayat, sida udah nengkebang National Blue Ocean Strategy (NBOS) kena ngemujurka program Tranformasyen Perintah (GTP) enggau Program Tranformasyen Ekonomi (ETP).

Menteri Muda Pemansang Menua Pesisir enggau Pekara Berumah Sarawak, Datuk Francis Harden Hollis madah, kena nempa komuniti nengah pengelandik kerejasama, Opis Menteri Pengerai Malaysia enggau Opis  Menteri Pemansang Orang Indu, Ruang Bilik enggau Komuniti udah dipilih nyadi ketuai NBOS 7 (1 Malaysia Faily Care) ti ngemeratka tiga raban iya nya orang tuai, orang timpang pendiau enggau indai tunggal.

“Tuju nya kena ngangkatka pengawa enda begaji ba mensia mayuh nengah chara ngemayuhka agi aktiviti pengintu pengelantang pendiau seraya nempa rayat ke bepenyiru,” pia ku iya.

Iya ke mega ADUN Simanggang bejaku munyi tu lebuh ke nutup Program Sehari Begulai enggau Orang Tuai sereta Orang Timpang Pendiau (OKU) Bagi Sri Aman ke diatur Opis Pengintu Pengelantang Pendiau(JKM) Bagi Menua Sri Aman di Hotel Seri Simanggang ditu malam tadi.

Ku iya baru, United Nation (1987) melabaka peresin orang tuai di Malaysia deka nambah 3.3 peresin belabuh ari taun 1980 manggai ba 7.4 peresin nyerumba taun 2020.

Ku iya, perintah mega enda melakang Orang timpang pendiau (OKU) lalu sida diperansang ngerejister diri ba Opis Pengintu Pengelantang Pendiau Mensia Mayuh ngambika perintah nemu penyampau enggau pendiau OKU ke amat, ngambika sida mudah agi merambu servis, program pengintu,tumu mantu, nyeliah sereta meri latih enggau pelajar.

“Di Bagi menua Sri Aman, Pusat Pemulihan Dalam Komuniti (PDK) udah ditumbuh kena mantu peranak menua nya kelebih agi OKU sereta sida sebilik.

Bisi 122 iku pengereja pengawa enda begaji ari mayuh bengkah kandang menua enggau tikas umur udah ngerejister diri ba JKM Bagi Menua Sri Aman,” pia ku iya.

Bela bisi ngulu pengerami nya,Direktor JKM Sarawak, Abang Shamshuddin Abang Seruji, Penulung Direktor JKM Bagi Menua Sri Aman, Sharifah Ranimah Wan Hashim, Sapit Residen (Pengawa Rama Bagi Menua Sri Aman, Hamdan Katang enggau raban JKM bukai.

Advertisement