SIMUNJAN: Menteri Muda Pengatur Pengeraja Asal Datuk Mohd Naroden Majais beratika raban kaunsilor nyadi sebengkah agi pengari perintah lalu ngansak sida bejalaika tanggung pengawa enggau manah.
Ku iya, tanggung pengawa kaunsilor diatu udah majak dipeguna ketegal tanggung pengawa opis kaunsil kandang menua nyau majak besai.
“Enti nuan ba penuduk nya, pejalaika enggau tanggung pengawa ke besai sereta sedia meri servis. Kaunsilor nyadi mata, pending enggau mulut perintah ke alai sida dipinta meri servis ba ikas ke pemadu manah,” ku iya.
Iya mansutka jaku tu maya bejadi pengawa ngangkat sumpah raban kaunsilor Opis Pelilih Simunjan (SDC) Hari Lima tu tadi.
Sepenyampau 30 iku kaunsilor SDC ngangkat sumpah ba mua Naroden ke bela digulu Sekretari Mendam Opis Menteri Kunsil Kandang Menua enggau Pemansang Komuniti Datu Dr Penguang Manggil.
Ari penyampau nya, 18 ari Parti Pesaka Bumiputera Bersatu (PBB), Parti Progresif Demokratik (5), Parti Bersatu Rakyat Sarawak (4) enggau Parti Rakyat Sarawak (3).
Naroden ke mega Sapit Menteri ba Opis Kepala Menteri (Pemansang Orang Dagang Bumiputera) madah perintah meretika pemesai tanggung pengawa opis kunsil lalu enggau kebuah nya penyampau raban kaunsilor nambah ari 25 ngagai 31, nyengkaum chairman.
Berindik enggau nya, iya ngansak raban kaunsilor nyadi pengari perintah sereta sida patut begulai enggau rayat ngambika nemu isu enggau penanggul ke ditapi rayat.
Iya merambu opis kunsil minta penemu ari raban profesional baka luya, arkitek, injineer sereta ke bukai nengah chara ngundang sida tu enggau ngulu aum komiti opis kaunsil.
Kaban Kunsil Nengri Simunjan nya mega ngansak raban kaunsilor matak mayuh agi raban nembiak nyereta bemacham program ke diatur opis kunsil ke alai sepenyampau RM100,000 disedia ungkup ngatur pengawa.
“Nengah program pemansang komuniti, mayuh agi raban nembiak patut dibatak nyereta ngambika bela tau nyaup ngemansang nengeri enggau komuniti,” ku iya.
Iya madah raban kaunsilor ngembuan tanggung pengawa besai meri penau ngagai raban nembiak senentang atur pekara dagang enggau awak bekereja ba palan SCORE.
“Nengah palan SCORE, nengeri tu deka majak mansang lalu raban nembiak patut bela ngiring pemansang ke nyadi kelebih agi ba SCORE, Ditu meh endur raban kaunsilor patut meri penerang ngagai raban nembiak,” ku iya.