KUCHING: Palan Pengenduh Arau tauka Anjung Singgah Yayasan Kebajikan Negara (YKN) Sarawak ti bepalan di Kuching udah nerima 246 iku orang diau ba palan nya.
Penyampau nya bepelasarka statistik ke dirikut berengkah 15 Oktober 2012 ngagai Februari 2014 ari YKN, ti ngerikutka sepenyampau 132 iku lelaki enggau 114 indu ari raban bansa Melayu, China, India, Iban, Bidayuh, Melanau enggau ke bukai.
Menteri Pengintu Pengelantang, Orang Indu enggau Pemansang Ruang Bilik, Datuk Fatimah Abdullah lebuh ditelefon madah, Palan Pengenduh Arau nya ukai semina dikena mantu orang kampar aja tang nyengkaum raban bansa ari menua pesisir ti datai ke mengeri ke nadai kaban belayan endur diau.
“Raban bansa ari menua pesisir ti datai ke mengeri ketegal dikangau ngulu interbiu gawa ti nadai belanja dikena nyuwa hotel (nyengkaum ke nadai kaban belayan endur diau) mega ulih diau ba Palan Pengenduh Arau tu.
“Orang ti datai lalu diau ba palan nya ketegal ngulu interbiu, Palan Pengenduh Arau tu mega meri sereta bekunsi penemu bakani chara maya interbiu,” ku iya.
Tuju penumbuh palan nya ukai semina nyendiaka endur diau aja tang nyengkaum meri pemakai enggau utai irup, nyadi palan intervensi, perubat, mantu ngiga pengawa sereta meri kaunseling ngagai orang kampar.
Dalam proses intervensi, barang sapa orang ke diau tauka orang kampar semina dikemendarka diau ba palan nya pengelama seminggu ngagai dua minggu, timpuh ti chukup endur mantu sida ngatika diri, ngiga pengawa sereta bulih endur diau ti senipak.
“Sepemanjai diau ba palan nya, sida (orang kampar) deka diajar pengelandik ke ulih mantu sida ngiga belanja,” ku iya.
Nambahka nya, Fatimah lebuh ditanya sekalika Opis Menteri Pemansang Orang Indu, Ruang Bilik enggau Raban Bansa bisi nganjung perambu ngagai Opis Menteri iya deka nambahka Palan Pengenduh Sementara YKN Sarawak, iya madahka;
“Naka ke diatu nadai perambu deka nambahka palan nya di Sarawak, laban kitai bepelasarka peminta enggau guna orang mayuh.
Kelimpah ari nya, nitihku seiku orang ti gawa ba palan nya madahka sida mayuh udah mantu orang ke diau ba palan nya nyengkaum ngiga ke pengawa ti ukai semina ba opis perintah aja tang nyengkaum ba kompeni.
Orang ti kala diau ba palan nya ukai semina rayat Sarawak aja tang bisi peranak Sabah, ku iya.
“Palan Pengenduh Arau tu mega bisi nerima sida ari Anjung Kasih, nyemaka bisi puang,” ku iya.
Palan Pengenduh Arau YKN Sarawak ti berengkah dibuka kena 15 Oktober 2012 bepalan ba Lot 289, Seksyen 9, Jalan Rubber disikap bilik tinduk, bilik makai, surau lelaki enggau indu, bilik interbiu, bilik kaunseling, bilik perubat sereta chukup endur 38 iku orang sekali.
Sebarang pekara ti deka ditemu pasal Palan Pengeduh Arau YKN Sarawak tau telefon ngagai lumur 082-233098 tauka 017-3782656.