KUCHING: Kepala Menteri Pehin Sri Abdul Taib Mahmud (gambar) besemaya netapka runding enda ngambi bagi ba atur pengawa perintah nengeri Sarawak ti deka dipegai Tan Sri Datuk Amar Adenan Satem.
Taib madahka taja pan iya dichirika nyadi Tuai Pemegai Menua (TYT) ukai reti penemu ti dibantaika iya mesti dititihka.
“Sesebuah nengeri semina seiku aja ketuai iya nya Kepala Menteri (Adenan). Lalu lalau aku ukai mandatori ti mesti dititihka perintah, TYT semina ke penyanding penemu.
“Lalau aku nya semina penemu aja, nya pan enti sema Adenan begunaka iya,” ku iya.
Taib ti nyadi Chairman Barisan Nasional (BN) Nengeri mansutka pekara nya dalam aum pengarang berita ti diatur ba opis iya di Wisma Bapa Malaysia ditu pagi kemari.
Taib ti nyadi kepala menteri dalam taun 1981 deka ngetu mangku penuduk nya berengkah 28 Februari tu, ti diperambuka Parti Pesaka Bumiputera Bersatu (PBB) nyadi Tuai Pemegai Menua nganti Tun Datuk Patinggi Abang Muhammad Salahuddin.
Adenan ke diatu ti mangku pengawa nyadi Menteri Tugas-Tugas Khas dichirika nyadi Kepala Menteri Kelima Sarawak deka ngangkat sumpah kena 28 Februari tu.
Bejaku baru, Taib madahka diri nadai pengirau ati ngelengka raban ti ditinggalka tang iya arap bendar udah nempa bala pemesai ke biak dalam BN ti bekualiti, ke ulih dipeda tiap kali maya pengawa bepilih.
Ba aum pengarang berita ke sama, lebuh ditanya bekaul enggau berita selebubu penuduk Menteri Pengawa Berumah ti mega Sapit Presiden PBB, Datuk Amar Abang Johari Tun Openg berengkah 1 March tu, dipelabaka nyadi Sapit Kepala Menteri, Taib madahka nya bepanggai ngagai perintah ke baru.
Iya madahka pemesai dalam PBB enda semina ngemeratka pengawa ti dipangku tang lebih beratka pemansang nengeri enggau rayat.
“Pekara nya bepanggai ngagai Kepala Menteri (Adenan) ila,” ku iya.
Nambahka nya Taib lebuh ti ngenang Sapit iya Datuk Patinggi Tan sri Alfred Jabu Numpang, iya madahka diri temegah ati ngagai Jabu ti sama bebendar ngemansangka nengeri nyentukka teulihka pemujur baka ti diasaika seharitu.
Ku iya, Jabu ti mega Sapit Presiden PBB mega mujur mai mayuh pemesai baru ari raban bansa Dayak ke dalam perintah.
“Iya (Jabu) nemu baka ni deka betapi enggau isu sensitif bekaul enggau bansa,” ku Taib seraya madahka Jabu nya lebih ari ‘orang kanan’.
Kelimpah ari nya lebuh ti ngenang sukung raban bansa China ngagai BN ke majak kurang beduduk ari mayuh sitak ungkup SUPP dirampas parti penyakal, iya madahka nya ukai nunjukka bansa China enda nyukung BN.
“Aku udah ngelalau SUPP ngambika meri peluang ngagai mayuh agi rebak baru, meri lalau engka muntang tang ngereja engka lebih tusah agi,” ku iya.