KUCHING: Sarawak udah ba penuduk ti betul sereta disadang endang tejapaika juluk nyadi menua maju enggau bepenatai pemisi tinggi lebuh manggai taun 2030.
Kepala Menteri Pehin Sri Abdul Taib Mahmud madah, nya beduduk ari pemayuh ubah pemansang udah dijapai Sarawak, kelebih agi pengudah penumbuh menua Malaysia.
“Diatu kitai teulihka penatai pemisi perkapita urung RM42,000, penyampau nya tinggi dibandingka enggau keterubah aku merintah taun 1981 ti semina teulihka penatai pemisi perkapita RM4,000, tang maya nya rega duit bebida.
“Juluk keterubah lebuh ngiring menua suba, aku deka nyendiaka mayuh peluang gawa tang maya nya kelia menua agi bisi charut lalu pekara keterubah dipejalaika ngulihka pengelantang enggau pemaik dulu.
“Pengelantang enggau pemaik dijapai nya baru bisi peluang ngemansangka menua enggau rayat, kitai mujur ngereja nya lebuh manggai taun 1990,” ku iya tiap ati Sarawak tejulukka ulih nyadi menua maju enggau bepenatai pemisi tinggi taun 2030.
Taib mansutka pekara nya dalam aum pengarang berita ti diatur ba opis iya di Wisma Bapa Melaysia ditu, kemari.
Iya ti deka ngetu nyadi kepala menteri kena 28 Februari madah Sarawak udah tejapaika mayuh pemujur dalam politik, ekonomi enggau sosial sereta pekara pelajar.
Dalam pemansang betanam betupi, nengeri mujur ngemansangka dua juta hektar tanah endur nanam kelapa sawit, ku iya.
Bejaku baru iya madah, diatu Sarawak udah sereta benung chakah ngemansangka macham industri nengah SCORE ti lalu ulih ngemajuka tengah menua Sarawak sereta nyendiaka mayuh pemansang ke bukai.
“Bala bakih baka Datuk Patinggi Tan Sri Alfred Jabu Numpang, Tan Sri Datuk Amar Adenan Satem enggau Datuk Amar Awang Tengah Ali Hassan sama ngemansangka perambu pemansang.
“Dalam pekara pelajar, Sarawak udah bisi enam buah universiti lalu dua buah sekula teknikal deka ditumbuhka ngambika tetapika peminta guna dalam SCORE.
“Dalam timpuh lima ngagai 10 taun ke deka datai nengeri kitai endang kiruh nyendiaka macham latih dikena nangkup peminta guna SCORE,” ku iya.
Kelimpah ari nya iya melabaka jemah ila nengeri tu deka nambah dua tau tiga mengeri iya nya di Baram, sereta di Baleh enggau ketiga dikerapka ulih dikemansangka ba garis antara bagi menua kedua tauka ketiga.