KUCHING: Seraya nyukung pengangkun Sapit Kepala Menteri Datuk Patinggi Tan Sri Alfred Jabu Numpang matak industri tikas dunya ke nengeri tu, Ketuai Pemadah PKR Vernon Aji Kedit ngenatai ke tanya ngagai Jabu, kemaya Sarawak deka nyadi nengeri tikas dunya?
Iya madah, nengah rizab belanja nengeri ke manggai RM22 biliun lalu ditambah enggau penatai ari pengawa nyual kuasa lekterik ngagai sekeda industri tikas dunya ti bejalaika operasyen dalam nengeri tu, Sarawak enda disangkal tau nyadi nengeri pemadu kaya ba Malaysia sereta mega ba Asia Tenggara.
“Kitai bisi pengaya, kitai bisi pengeraja asal lalu kitai ngarapka mayuh agi orang ari menua luar datai beranakka puku ditu. Diatu rayat Sarawak ngarapka semua penguntung ari projek ke besai nya dibagi bela ungkup pemaik rayat,”ku Vernon.
Iya madah rayat Sarawak ukai semina dekaka nengeri tu dikemansang tang mega dekaka nengeri tu sama tikas enggau nengeri tauka menua bukai ke udah kaya.
“Nengah pengaya ke dikembuan nengeri tu, pekara ke patut dikemerat iya nya atur penyambung. Lengkaka dulu runding kitai ba projek Jalai Pan-Borneo ke enda ditemu pengudah. Keterubah, gaga jalai lapan alur ke nyambung Lundu ngagai Limbang.
“Kelala jalai nya nengah nama Jalai Besai Kenyalang lalu sambung ngagai mengeri besai sereta mit ba menua pesisir ngambika kandang menua pesisir bela disikap enggau atur penyambung ngagai kandang mengeri. Atur tu deka mai pemansang ngagai kandang menua pesisir,”ku iya.
Kelimpah ari nya, Vernon mega minta perintah ngaga sepital enggau kelinik ti meri servis tikas dunya ba serata nengeri seraya madah rayat di menua pesisir mengkang nagih servis pengerai lalu pekara nya patut dikemerat.
“Ketiga, pekara pelajar patut dulu dikemerat. Aku ukai semina bejuraika senentang perengka guna ke patut bisi tang mega ba senentang perengka tambah ke bukai enggau raban orang gawa ke tau ngangkatka tikas pelajar kitai.
“Keempat, atur pengangkut nengeri tu jauh tinggal lalu pekara nya ulih dipeda kitai ba penusah perau tauka feri ti karam ti udah nabanka nyawa mensia,”ku iya.
Ngenang senentang pekara pengereja pengawa, Vernon madah mayuh peranak Sarawak ke gawa ba menua luar keran deka mulaika diri lalu bekunsi pengelandik sida lalu nya nyengkaum orang gawa perintah ti tau dilatih ngambika nyadi pengereja pengawa ke landik.
“Perintah patut enda bekena gaya rampa menua Sarawak ti bebukit nyadika kebuah jalai besai enda ulih digaga. Enti kitai bisi pengeran politik nentuka perengka guna enggau servis tikas dunya disedia, tentu bisi jalai kitai ngemujurka juluk nya.
“Sapa nyadang kitai ulih ngaga palan tekat ai tikas dunya? Enti pia, nama kebuah kitai enda ulih ngaga jalai besai tikas dunya, sepital, sekula enggau universiti?”
Vernon madah: “Sigi nyadi tanggungpengawa tiap perintah nyendiaka perengka guna ke manah, pekara pengerai, pelajar enggau pengereja pengawa ti meri servis.
“Peranak S’wak udah jauh mereti ke alai nadai pekara bukai ke deka dipinta kelimpah ari perengka guna tikas dunya ke setipak enggau palan SCORE ti nyadi sebengkah projek tikas dunya,”ku iya.