SARATOK: Gerempung Pengelantang Pendiau Tuai Rumah (PKTR) Parlimen Saratok udah ngatur aum keterubah renggat 2013-2015, kemari.
Dalam aum nya, mayuh macham pekara udah dikerandau komiti tinggi gerempung kelebih agi bekaul enggau isu pengelantang pendiau enggau rama Tuai Rumah (TR.).
Ba aum renggat kererubah, Chairman PKTR Parlimen Saratok, TR. Aju Mawat udah betanya ngagai semua kaban komiti bekaul enggau 40 iku TR ke udah diketu mangku pengawa sida.
“Patut ke enda kitai ke nyadi kaban gerempung mutarka pekara tu, ambika chunto baka mai pekara tu ngagai piak ke bekaul,” ku tanya iya.
Berebak enggau nya mega, TR Aju bisi betanya ngagai kaban komiti bekaul enggau setipikit chiri mangku pengawa nyadi tuai rumah ke baru.
Beduduk ari aum nya, bekaul enggau dua isu ke udah dibantaika, kesemua kaban komiti sepenemu mai dua pekara nya ngagai piak Residen Bagi Menua Betong enggau Kaban Parlimen Saratok, ke lalu nyadi Menteri Pemansang Rama Sarawak, Tan Sri William Mawan Ikom ngambika ulih nyaut tanya nya kelimpah mutarka penanggul dalam awak ke pandak tu.
Kelimpah ari nya, komiti tinggi PKTR mega setuju meri bantu mata duit ngagai rumah panjai TR Kupon, Itop Awik ke udah dituntung penusah angus taun nyin tadi.
Sama bisi dikerandau ba aum nya bekaul enggau peminta SDNU ke minta bantu ari PKTR dikena ngumujurka sebarang aktiviti ke deka diatur jemah iya nya program ‘Education Talk and Trust Fund’.
Senentang pekara nya, piak komiti udah ngaga jaku putus ngelanjarka sebarang pemutus ke deka dibai ba aum nangkanka tu ila.
Bisi 13 iku kaban komiti tinggi gerempung bisi datai ngulu aum nya, ke diatur ba sebengkah hotel tebilang ditu, kemari.