Anda di sini

Myanmar muka mata raban dagang DCCI

Advertisement

KUCHING: Balai Dagang enggau Industri Dayak (DCCI) udah ngatur penemuai dagang sambil belajar ngagai Yangon, Bagol enggau Thanlyin di Myanmar, bedau lama ke udah semina kena muka mata aja.

Bisi 55 kaban DCCI nya belajarka penemu, iya nya orang dagang ari Malaysia enti sema deka muka dagang di Myanmar patut bejejaga napi pemar ekonomi Myanmar kelimpah nitihka atur menua nya.

“Orang ke megai kuasa di Myanmar dalam kandang 50 taun suba, iya nya sedadu, lalu semina dalam 2 ½ taun tu ke udah nadai agi dipegai sedadu tang udah ngatika diri nitihka atur undang-undang demokrasi.

“Berindik ari nya, Myanmar enggau naka ulih nitihka singkang menua maju bukai di dunya tu,” ku jaku DCCI ke dianjung nengah surat ngagai Bilik Berita ditu, kilah ensana.

“Enggau pemesai tanah, pengeraja rampa menua, tebing tasik ke luas sereta mayuh pemisi baka batu ‘Ruby’ enggau ‘Jade’, mayuh peluang ekonomi ke ulih digaga nyengkaum kebun sawit, getah, proses agro, ngaga baja, semin, elektronik, ngaga perengka guna plastik, mungkus barang, hotel enggau pengawa begaga ke rumah,” ku penerang nya.

“Pejalai kami tu chukup meri peransang enggau peneleba ngagai kami semua kelebih agi ba senentang pekara ke enda entu terang ba kami, kami bepeluang nanya ngagai orang Myanmar empu baka ni ku chara bedagang di menua nya,nyangka ulih ngatur dagang kunsi enggau sida jemah ila,” ku DCCI.

Rayat ke diau di menua nya pan manah, sereta rajin belajar nyengkaum ngembuan ulah ke positif kelebih agi lebuh nyambut temuai datai ari Malaysia.

Dalam pejalai nya mega, kaban DCCI bepeluang berandau enggau orang dagang ari Malaysia ke udah lama bejalaika pengawa dagang di Yangon dalam kandang 10 taun ke udah.

Dalam pekara pengawa rama, pesereta ari DCCI bepeluang nemuai ngagai Bagol enggau Thanlyin, lalu ngasaika pejalai ngena kerita dua jam, lalu dalam pejalai nya mega sida iya bepeluang meda genturung pendiau orang Myanmar, meda pengawa mensia mayuh dia meri sedekah ngagai urung 1,000 iku paderi Buddha, kilang tenun sereta pendiau mensia mayuh di genturung pendiau Mon, kelimpah ari bebelika batu berlian (Jade enggau Ruby) di Bandaraya Yangon.

Pejalai lima hari nya ke belabuh ari 10 Feb betuaika Penyanding Penemu DCCI enggau Penyanding Penemu Kaunsil 1Malaysia Sarawak Datuk Joseph Salang Gandum.

Raban pesereta nya mega bisi nemuai basa betemu enggau Duta Malaysia ke Myanmar, iya ti dibasa Dato Dr Faisal Muhammad, enggau Penulung Direktor Pengawa Dagang MATRADE Sadat Foster.

Dua bengkah aum bisi diatur begulai enggau Mandal Presiden Dewan Dagang The Republic of the Union of Myanmar Federation of Chambers of Commerce and Industry (UMFCCI), Dr Maung Maung Lay kelimpah ningaka penerang ari Mandal Presiden Malaysian Business Council, Joseph Lopez.

Chairman Pengatur Pemansang Pengawa Dagang DCCI, Kilat Beriak madah, pejalai ngiga penemu bansa nya mega diperambu deka diatur ngagai menua ASEAN bukai dalam taun 2015.

Advertisement