DUA KAKI NIKI: Perengka kayu ba dalam bilik sebuah rumah di Lurung 5, Tabuan Dayak melepu ketegal ampuh ai dini hari kemari.
KUCHING: Kampung Tabuan Dayak di Kuching sekali agi dituntung penusah bah ngenyit ba taun 2014 tu pengudah ujan lebat nurun enggau enda ngetu berengkah malam Hari Empat nyentuk dini hari kemari.
Serak tu, peranak genturung pendiau nya udah enda sabar agi lalu minta opis kunsil kandang menua ti diarika Majlis Bandaraya Kuching Selatan (MBKS) beratika pekara tu enggau berat.
Pengawa ngaga projek rumah tinggi ba Jalai Wan Alwi, Tabuan Jaya dituduh nyadika kebuah genturung pendiau Tabuan Dayak deka dituntung penusah bah tiap kali ujan lebat nurun enggau enda ngetu.
“MBKS . . . berapa kali udah kami ngenataika pinta ngagai opis kunsil minta parit diperesi ngambika pejalai ai enda tetekul,”ku sebana peranak Tabuan Dayak.
Pun taun tu tadi, iya nya kena ke lemai 1 Januari, genturung pendiau nya napi penusah ke sama pengudah ujan lebat nurun enda bebadu.
Peranak genturung pendiau nya udah ngenataika mayuh riput ngagai MBKS ngambika ulih nentuka penusah tu enda nyadi baru.
Ba penusah ke nyadi dini hari kemari, sekeda rumah kelebih agi ba Lurung 5 ditiki ai peninggi 2 kaki lalu balat ngerusak perengka dalam rumah.
Ba bah ke nyadi dulu agi ari tu, pemesai MBKS ke dikerandau maya nya madahka sida nadai daya nagang bah nyadi ba Tabuan Dayak ketegal penusah nya nyadi berindik ari ujan lebat enggau ai pasang.
Timbal ke munyi nya nyata enda ngemantupka ati peranak Tabuan Dayak ke kena tuntung bah lalu sida minta atur ti engkeman dipejalai ngambika penusah enda nyadi baru.
“Kami udah enda sabar agi . . .minta MBKS, raban kaunsilor, pengari rayat enggau orang politik mutarka pekara tu. Pansik enggau silik kebuah Tabuan Dayak suah dituntung bah ngenyit,”ku sebana peranak Tabuan Dayak.