SIBU: Pengawa ti dipejalaika Unit Bumiputera Parti Sa’ati Rakyat Sarawak (SUPP) pampang Sibu ungkup parti seruran dikeingat taja pan unit nya semina raban mit dalam parti SUPP.
Ketuai Unit Bumiputera SUPP Sibu Andrew Shilling Banggit madahka pengaga ati sentang pekara nya ulih dipeda lebuh 13 iku kaban unit nya dipadu nyadi kaban opis kaunsil kandang menua (PBT) apin lama ke udah.
“Tujuh iku kaban Unit Bumiputera udah dichiri nyadi kaban Majlis Daerah Luar Bandar Sibu (MDLBS) lalu enam iku agi nyadi kaban Majlis Daerah Matu Daro (MDMD).
“Tu mandangka pengawa ti dipejalaika Unit Bumiputera SUPP Sibu dalam parti ngelama tu ngemegahka ati bala ketuai parti ba tikas pampang,” ku iya madah ngagai pemberita, malam kemari.
Andrew ke mega Sekretari Politik Kepala Menteri dikerandau pemberita ba pengerami makai lemai pengaga ati ke 13 iku ari Unit Bumiputera SUPP Sibu ti dipadu nyadi kaunsilor. Pengerami makai lemai nya diatur ba sebengkah restoren ditu.
Sama bisi ngulu pengerami nya Temenggung Vincent Lau Lee Ming, Sapit Chairman Opis Kaunsil Kandang Bandar Sibu Dato Andrew Wong, Sekretari Politik Kepala Menteri Pau Kiew Chuang, Pemancha Stanley Geramong, chairman pengatur pengerami, Kr Linus Melin Lembang enggau bala bukai.
Tujuh iku Unit Bumiputera SUPP Sibu ke dipadu nyadi kaban kaunsil MDLBS iya nya Christopher Ugot Nyaring, Ladong Engkol, Unjah Besh, Geronsin Maja, Lipan Jelani, Winston Suji Cheri enggau Lidwina Mathew.
Enam iku agi ke nyadi kaban kaunsil MDMD iya nya Ambrose Lopeng, Linus Melin Lembang, Mador Rendah, Anthony Alli Embi, Kasi Penguang enggau Micheal Ili.
Ku Andrew, bala kaban Unit Bumiputera mega dikemeratka mangku pengawa nyadi ketuai raban bansa baka tuai rumah, pengulu, pemancha enggau temenggung.
“Tu mandangka pengawa ti dipejalaika kitai dikemeratka parti, taja pan penyampau kitai mimit dalam parti SUPP,” pia ku iya seraya madahka Unit Bumiputera SUPP Sibu ngembuan 4,649 iku kaban diserata Pelilih Sibu.
Berebak enggau nya, iya ngarika bala kaban Unit Bumiputera meri terima kasih ngagai chairman SUPP Sibu, Dato Sri Wong Soon Koh laban ke meri sukung sereta udah arapka bala kaban unit nya.
Andrew mega ngelalau bala kaban unit ke dipadu nyadi kaban kaunsil nya seruran betemu enggau nembiak redak betanyaka penanggul ke ditapi sida di rumah panjai ba kandang menua ke ari baruh pegai sida.
“Kelimpah ari pekara pemansang enggau perengkaguna, sida mega patut nyaup mensia mayuh ba kandang menua nya ngulihka bantu baka e-Kasih, pengelantang pendiau, dokumen pengelala enggau sekeda utai bukai,” tandu iya.
Iya mega arapka bala kaban kaunsil nya ulih begempung enggau pangan diri ngambi pulaika pemaik ngagai peranak menua ke ari baruh pegai sida.