KANOWIT: Perintah semampai ngemeratka penanggul ke bisi nyadi ba sekula primari di ulu sungai tauka menua pesisir nengeri tu.
Kaban Parlimen Kanowit Datuk Aaron Ago Dagang madah, perintah enda bechiping ba pengawa ngatur pemansang baikka ba rumah panjai tauka ba sekula menua pesisir.
“Nya alai, ketuai raban bansa tauka sekula ti bisi peminta tauka deka mantaika penanggul tau terus dianjung ngagai pengari rayat ngambika ulih diputarka,” ku iya.
Aaron mantaika jaku nya maya bejadika program nyuaka Bantu Beg Sekula ngagai 100 iku nembiak Sekolah Nanga Nirok, empai lama tu tadi.
Bela bisi datai maya pengawa tu iya nya Kaban Kunsil Nengeri (Ngemah) Alexander Vincent sereta bala ke bukai.
Nampung jaku iya baru, Aaron maya tu mega ngelalau rayat ngambika anang jampat ringgat enti sema peminta sida ngagai perintah empai ulih diberi.
Tang ku iya madah, rayat tau nganjung surat peminta baru ngagai opis ti bekaul.
“Kitai minta rayat besabar laban kitai endang meri bantu nyema bisi pemeri ari perintah.
“Tang anang lengkas ngembuan peragam ke enda manah ngagai perintah laban peminta rayat diberi chara bererenggat,” ku iya.
Program ke diatur Opis JASA Sitak Sibu enggau Mukah sehari nya dikena ngelempungka tating pengidup apai indai nembiak ke bisi kena tinggang penusah ampuh bah maya bulan Disember 2013 suba