KUCHING: Skim MyHome iya nya skim ti meri bantu belanja dikena meli rumah keterubah ti deka dipejalaika berengkah bulan April tu ila, nerima sambut ti manah ari raban ruang bilik bepenatai pemisi baruh ari RM3,000 sebulan.
Perintah nengah skim nya deka nyendiaka bantu belanja nyentuk ngagai RM30,000 ungkup raban ruang bilik bepenatai pemisi kurang ari RM3,000 sebulan.
Skim nya dibantaika Menteri Besai, Datuk Seri Najib Tun Razak, pengudah aum keterubah Majlis Perumahan Negara (MPN) apin lama di Putrajaya.
Lai Masir, 34, lebuh ditanya bekaul enggau skim nya madahka diri temegah ati ngagai perintah laban ti seruran ngemeratka pengelantang rayat kelebih agi raban nembiak ti baru gawa sereta semina makai gaji tauka teulihka penatai pemisi kurang RM3,000.
Nengah skim nya ku iya, perintah udah muka awak ngagai raban nembiak ti baru gawa teulihka penatai pemisi kurang RM3,000 ulih meli rumah keterubah.
“Ba penemu aku skim nya manah, perintah beratka pengelantang rayat kelebih agi ngagai raban nembiak ti baru gawa sereta semina teulihka penatai pemisi urung RM1,500 ngagai RM2,000 sebulan.
“Laban enti nadai nya (skim) raban nembiak tetap enda tebelika rumah. Gaji setaun niki semina berapa aja, tang rega rumah tetiap taun niki enggau jampat.
“Nambahka nya iya ngarapka perintah beratka raban orang ti udah gawa lima ngagai 10 taun ti teulihka penatai pemisi ruang bilik RM3,000 ke atas, tang semina seiku aja ke gawa dalam ruang bilik nya, sama ulih diberi peluang bulih skim nya (MyHome),” ku Lai.
Dening, 33, lebuh ditanya pekara ti sama mega madahka diri setuju enggau pemanah skim nya tang patut dipejalaika enggau engkeman.
Iya bepenemu perintah sebedau ngemendarka skim nya ngagai peminta endang patut dulu ngenukuka pematut tauka enda (bulih skim).
“Tuju skim nya ti deka meri bantu belanja meli rumah keterubah nya endang manah, tang perintah enda tau enda nentuka skim nya diberi ngagai orang ti ditagit (penatai pemisi ruang bilik RM3,000 sebulan).
“Tuku ke dulu pengulih orang ti minta skim nya, sekalika amat patut tauka enda,” ku iya seraya madahka selalu bisi penanggul bekaul enggau sekalika penumbuh sesebengkah skim datai ba raban ditagit tauka enda.
Apin lama dalam surat kabar bisi ngeriputka perintah nyendiaka bantu belanja nyentuk ngagai RM30,000 ngagai raban ruang bilik bepenatai pemisi kurang RM3,000 ngambika ulih meli rumah keterubah ngena rega ungkus murah, berengkah 1 April tu ila.
Nengah skim MyHome nya, orang ti bulih semina patut mayar rega rumah ungkus murah ti ditetapka ba tiap nengeri, lalu laluh iya dibayar perintah terus ngagai pemaju.
Ambika banding, enti rega rumah ungkus murah ba sesebuah nengeri ditetapka RM40,000 tang pemaju patut nyual ngena rega RM70,000 dikena nampung ungkus enggau mulaika pengun tung, perintah deka mayar laluh RM30,000 ti dibayar terus ngagai pemaju.
Menteri Besai lebuh ti bejaku bekaul enggau skim nya madah, perintah nyendiaka belanja RM300 juta dalam Bajet 2014 ungkup skim MyHome ti dipelaba nguntungka urung 10,000 orang ke patut.
Iya madahka pemaju ti deka ngaga rumah nengah skim nya tau ngenataika peminta ngagai Kementerian Kesejahteraan Bandar, Perumahan dan Kerajaan Tempatan, lalu orang mayuh (pemeli) tau ngenataika peminta nya pengudah dipenyadika 1 April tu ila.