KUCHING: Parti Pesaka Bumiputera Bersatu (PBB) pampang N6 Tupong deka ngatur Program Ubah Menua (PTN) kena 25 ngagai 27 April tu ila di Kem Bina Negara Sempadi Lundu.
Nitih penerang ari Ketuai Pengerembai Berita Parti PBB pampang N6 Tupong, Sharifah Aishah Tuanku Fauzi madah ngagai pengarang berita ensana, program nya deka diatur begulai enggau Biro Tatanegara (BTN).
Iya madah, tuju program nya diatur kena ngerapitka kaul 31 Ranting di baruh pampang N6 Tupong.
“Kami nagit lebih 150 iku kaban ari pampang Tupong ngulu PTN ti diatur kena 25 ngagai 27 April tu.
“Nengah program tu kami ulih meri penerang pemadu baru pasal tanggungpengawa tiap iku kaban ba renggat Ranting enggau Pampang sereta merambu macham aktiviti.
“Ari program tu kami mega deka nerima timbal sereta nemu penanggul ti ditapi renggat Ranting,” ku iya.
Kelimpah ari nya, Aishah madah, PBB pampang N6 Tupong deka ngatur program Tilawah Al-Quran enggau pekit nasyid berengkah 6 ngagai 10 April.
Pekit nya ku iya deka diatur ba Masjid Darul Khidmat Kampung Sejijak.
“Pekit tu ila deka dipenyadika Datuk Fadillah (Menteri Kerja Raya) lalu Datuk Daud Abdul Rahman (Menteri ba Opis Kepala Menteri -Pekara Islam) deka ngatur pengawa nutup pengerami enggau nyuaka perais,” ku iya seraya madah, pekit nya diatur ninting taun.
Peminta nyereta pekit nya deka ditutup 31 Mach lalu pom peminta deka disadung berengkah minggu baru.
Sebarang penerang tauka tanya tau betelefon ngagai Aishah ba lumur 082-230097.