KUCHING: Raban Nembiak Parti Pesaka Bumiputera Bersatu (PBB) mantah pengawa sekeda raban orang ke sengapa bekenaka laman sosial nyadika palan endur sida mansutka petenah sereta bejaika raban ketuai perintah nengeri Sarawak.
Ulah laman sosial nya ti ngempuru petisyen ngambika tau dianjung ngagai Yang di-Pertuan Agong ketegal ti deka mantah perambu nyiri Pehin Sri Abdul Taib Mahmud nyadi Tuai Pemegai Menua (TYT) Sarawak pengudah iya ngelengka pangku pengawa Kepala Menteri Sarawak kena ke 28 Februari tu enggau terang ngelaban peneka enggau runding majoriti rayat Sarawak ti keran meda pengawa nya dikemujur ke nyadi basa ngagai Pehin Sri Abdul Taib ke udah bebendar ngemansangka nengeri Sarawak.
Ketuai Raban Nembiak PBB Datuk Fadillah Yusuf meratika petenah bejaika Pehin Sri Abdul Taib ke dipansut nengah laman sosial udah ngelui adan sereta patut dibantah.
Ku iya, semua petanah ke diungkup ngagai ketuai nengeri Sarawak ke mega Presiden PBB enda ngembuan sebarang penegap bukti lalu digaga enggau tuju beambi ulih ari pekara politik.
“Pehin Sri Taib ngembuan rikut pemadu manah maya ngiring Sarawak pengelama 33 taun ke alai iya mega mujur ngangkatka ekonomi nengeri.
“Palan SCORE ti ditumbuh asil buah penemu Pehin Sri Abdul Taib udah matak RM28 biliun puku diperanak lalu deka nentuka Sarawak nyadi nengeri pemadu kaya di Malaysia jemah,”ku iya ba siti surat penerang kemari.
Berindik enggau nya, Raban Nembiak PBB ngasai, petenah ke dipansut nya ketegal ti ngembuan ati ke kelalu bingking ke penegap Barisan Nasional (BN) Sarawak sereta pemaik pengidup pupu raban bansa nengeri tu, tandu iya.
Iya nambah, raban nya sanggup bekenaka sebarang aja chara ngambika ulih bejaika kepala menteri ketegal ti deka ngemantup juluk diri.
Fadillah ke mega Menteri Kereja Raya enggau ADUN Petra Jaya chukup pechaya rayat Sarawak enda begunaka runding ari orang luar ba atur nentuka sapa ke patut nyadi Tuai Pemegai Menua enggau sapa ke patut nyadi kepala menteri Sarawak.
“Raban Nembiak PBB bebasaka jaku angkunka Raja enggau Menua lalu deka nerima sapa aja ke deka dichiri Yang di-Pertuan Agong mangku kededua pangku pengawa besai nya.
“Atur nyirika pangku pengawa nya sigi hak enggau pemintar Yang di-Pertuan Agong,”ku iya.