KUCHING: Opis Kandang Bandar Padawan (MPP) deka nyaup nyendiaka perengka kena bedagang ungkup orang ti chakah sereta sanggup nyungkak pengelantang pendiau diri.
Chairman MPP, Lo Khere Chiang madah, bantu tu diberi ngagai orang ke seranta tang beamat-amat deka bedagang ngichaka ulih nyungkak pengidup sida sebilik.
“MPP bisi teda duit ari opis menteri, barang sapa ari raban seranta tang sanggup ‘bebuai dadu’ deka ngemansangka diri nengah jalai bedagangka pemakai, kitai enda sanggu mantu sida ngena perengka ti dipeguna baka nyemari steel.
“Enti sida nadai modal, sida tau betanya ari opis kaunsil minta bantu. Kami irau enggaika pengudah bulih duit, nyemari steel nya nadai dipeda agi….enda nemu kini tunga.
“Kami endang amat deka mantu sida tu tang nangika bantu nya disalah guna,” ku iya seraya madah, atur tu udah kala dipejalaika dua taun ke udah.
Baka nya mega opis tu ulih nyaup sida meli injin jait dikena bejait sereta ngiga belanja kena nyungkak penatai pemisi sida.
“Utai dikenangika kami, enggai ke sida iya semina ngambi injin jait aja, lalu udah nya dijual ngaga orang bukai. Amat iya enda kala nyadi di sitak MPP tang ba sitak bukai, utai tu bisi nyadi,” ku iya.
Kelimpah ari nya, peranak menua ke amat seranta dilalau ngerejista diri nengah program ‘e-kasih’ ari baruh Opis Pengelantang Pendiau Raban Bansa (JKMS) ke besemak enggau sida.
Lo madah, pengawa ngerejister diri nengah sistem ‘e-kasih’ nya berat laban nama sida ke deka dibantu MPP ulih ambi ari JKMS.
Naka ke diatu, kami udah ngaga pengawa kami enggau naka pemanah. Baka taun nyin tadi, MPP bisi mantu ngaga 3 buah rumah ungkup orang seranta.
“Baka nya mega taun tu, pengawa ngaga rumah ungkup orang meskinseranta deka terus dipejalai lebih agi ungkup orang ke amat-amat begunaka rumah baka indai tunggal ke mayuh anak,” ku Lo.
Iya madah baka nya lebuh dikerandau pengarang berita pengudah bejadika atur pengawa ‘Ramah Tamah Tahun Baru Cina MPP 2014’ di opis kunsil nya semak ditu, ensana.
Lo nandu, bisi sekeda kes alai rumah orang angus, MPP bela mantu orang ke kena tinggang penusah baka tu.
“Ba pengawa ngaga rumah ungkup orang seranta tu, sida patut ngembuan tanah, nya baru MPP ulih mantu ngaga rumah, tang enti sema nadai tanah, sida iya tau ngagai Opis Pemansang Pengawa Berumah (HDC) minta nyuwa flet ke mayuh udah digaga HDC di nengeri tu, lalu semina mayar suwa urung RM100 sebulan.
“Enti udah lama nyuwa enggau bayar nyampau nya ninting bulan, nyau kelama ila unit nya tau dibeli.
“Lebuh kitai nyebut seranta, jangka aku enda kala kitai ninga orang parai ketegal enda makai, tauka nadai rumah….Pengabis seranta pan nyangka enda chukup duit kena meli utai ke diguna tiap hari. Naka ke diatu, di sitak MPP nadai betapi enggau penanggul bansa nya,” ku iya.
Perintah udah mayuh ngaga program kena ngemunaska penyeranta ba kandang mengeri enggau menua pesisir.
“Nya alai, kitai ngambi peluang nya lalu ngiga orang ke amat-amat seranta. Nya kebuah MPP begunaka tuai komuniti mantu kami ngiga orang bansa tu dalam komuniti sida ngambika kami muntang ngenataika bantu,” ku iya.
Sebedau nya, ba jaku iya ngepunka atur pengawa Ramah Tamah Tahun Baru Cina 2014 MPP, Lo madah beratika penyulut MPP sepemanjai 2013, mayuh program-program baruh kaunsil tu udah mujur diatur.
Program baka Nengeri ke Likun di sitak MPP udah mujur ngurangka indeks penyampau pengawa salah.
Lalu baka nya, jalai alun ba genturung pendiau mayuh udah dibelakin lalu udah tembu digaga dalam taun nyin tadi.
“Taja pan kitai di MPP udah mujur ngereja pengawa kitai, tang kitai mega betapi enggau mayuh macham penanggul, tang iya enda nagang kitai terus majakka ‘Agenda Transformasi’ perintah, tang iya mega nyadi kayu depa MPP nyulut mutarka penanggul ke ditapi rayat.
“Aku arap bendar enggau pemisi kaban opis kaunsil baru lalu orang ke profesyenal baka arkitek, injinir, luyar enggau orang dagang ulih mantu sereta meri penemu sida ngambika pengawa ke digaga kitai ulih dipejalaika enggau manah,” ku iya.
Sama bisi ngulu atur pengawa nya, Sekretari MPP Michael Saweng , ketuai raban bansa enggau sekeda pemesai Parti Sa’ati Rayat Sarawak (SUPP).