Datuk Naroden Majais
Dikena ngenegapka ekonomi, semua orang dagang bumiputera tau minta bantu ari Superb
KUCHING: Senipak enggau juluk perintah deka ngenegapka ekonomi, orang dagang bumiputera diperansang minta bantu ari Skim Usahawan Permulaan Bumiputera (Superb).
Menteri Muda Pemansang Orang Dagang, Datuk Naroden Majais madahka, Superb nya entara inisiatif perintah ti diungkup ngagai raban nembiak bumiputera lebih agi kompeni ti baru ditumbuh.
Juluk deka nempa mayuh agi orang dagang biak, kompeni nya mega dipelabaka bisi peluang ngerembai jauh agi sereta ngembuan penemu baru.
“Aku enggau gaga sereta temegah ati ngelaluka peminta ari orang dagang biak Bumiputera Sarawak sama ngerebut peluang tu dalam pengawa ngenegapka ekonomi bumiputera Sarawak lebih agi,” ku iya nengah penerang berita kemari.
Superb dipenyadika Menteri Besai Datuk Seri Najib Razak ti ngungkupka belanja RM30 juta taun tu kena 14 September 2013.
Atur peminta Superb tu dibagi ngagai dua kategori, bumiputera ti beumur entara 18 enggau 40 taun, lalu kompeni ti dipegai bumiputera 30 persin sereta bejalaika pengawa kurang ari tiga taun.
Pekara ti disengkaum iya nya teknologi pemadah, ‘multimedia kreatif, pembangunan kandungan, pembangunan perisian (sector Bidang Ekonomi Utama Negara)’, betanam betupi, ‘pembuatan, pembinaan, bioteknologi’ enggau teknologi gadung.
Taja pia, TERAJU ti nyadi secretariat nadai perambu ngeletakka bagi industri tauka sector dipilih, tang meri peluang ngagai peminta ti merambu penemu nengkebang, inovatif enggau ngemeranka runding diluar kutak.
Nitihku iya, geran nya diberi bererenggat ngagai penerima nitihka guna enggau pemujur dagang ti diperambu nengah ‘Cradle Fund, Kumpulan Modal Perdana Sdn Bhd, Malaysia Venture Capital Management, Multimedia Development Corporation, MyCreative Ventures enggau Malaysia Technology Development Corporation’.
Naka ke diatu peminta ari Sarawak bisi 40 iti lalu dipelabaka nambah lebuh datai ba timpuh peminta nya ditutup.
Peminta renggat keterubah deka ditutup kena 21 Februari 2014.
Penerang ti silik tau ditanya nengah telefon 082-311686, 082-312648 tauka 03-78398000. Orang mayuh mega tau meda ba www.teraju.gov.my.