NGANGATKA ISI DULU: Bala nembiak ditentuka ngangatka isi dulu sebedau besemekih enggau pangan diri ba pekit nya.
1…2…3…BELANDA: Kuah dipebasa bejadika pekit.
BINTANGOR: Sekolah Kebangsaan (SK) Tulai udah mujur ngatur ‘Kejohanan Merentas Desa 2014’ , bedau lama tu ke udah.
Pekit nya dipenyadika kepala pengajar sekula nya empu Kuah Rames.
Pekit tu mega dibagi ngagai empat kategori iya nya Tahap 1, kategori indu enggau lelaki enggau Tahap 2 kategori indu enggau lelaki.
Tuju pekit ke diatur ninting taun tu iya nya meri awak ngagai semua nembiak sekula ngambi bagi ba pengawa kokurikulum.
Nambahka nya, ku Kuah, pekit tu dikena milih nembiak ngarika sekula ngagai ‘Kejohanan Merentas Desa Peringkat MSSR Daerah Meradong’ ila.
“Ari pekit tu mega, kitai ulih ngerekaika ulah rinduka pengawa lumba enggau main ba bala nembiak kelimpah ngemeratka pengidup bepengerai,” pia ku iya madah ba pekit nya.
Kelimpah ari nya, ku iya, pekit baka tu tau nempa nembiak ransing agi besemekih enggau pangan diri ngulihka pemujur.
Perais pekit serak tu disepunsa Koperasi Keluarga Kassim Baayak Bintangor Berhad lalu disuaka Kuah ngagai bala pemenang.
NAKA ALAH: Sekeda ari nembiak bebendar besemekih ngenataika diri ba adan.
NYADIKA KENANG: Bala nembiak begambar begulai enggau pengajar sereta sekeda ari bala apai indai sepenembu pekit diatur.