MULAIKA PENEGAP ‘POLIS HUTAN’ MENYA: Salleh (tengah) diapit Isa (kiba) enggau Zahari ngemataka atur pengawa nyerah tugas ditu.
KUCHING: Peminta ngambika tau ngenegapka baru Raban Gerakan Am (PGA) baka ti dikemeratka dua buah nengeri di sepiak timur ditu, Sabah enggau Sarawak, deka dianjung ngagai perintah besai.
Direktor Opis Pegelikun Dalam Menua enggau Pengelikun Mensia Mayuh Bukit Aman Datuk Seri Salleh Mat Rasid madah, penegap sesebuah batalion PGA maya tampak rita nyadi ‘polis hutan’ menya ngembuan 800 iku kaban ari penumbuh empat kompeni enggau empat platun, dibanding enggau diatu, sebuah batalion semina bisi 600 iku kaban ari tiga kompeni enggau tiga platun.
“Kami minta ngambika penyampau kaban dalam batalion dikenegap sereta ditambah baka suba ngambika PGA ulih ditusun enggau manah ari sukut pengawa lalu beratika pengelantang pendiau PGA dijaga lebih agi ba pekara kemisi enggau utai bukai.
“Kami ulih bejalaika pengawa ngena penyampau tubuh baka ke diatu tang enda lantang ati laban dalam sebatalion semina bisi tiga platun enggau tiga kompeni, enti penyampau tu ditambah ngagai empat, kami ngembuan manah agi tusun begintir bejalaika pengawa,” ku iya.
Iya madah baka tu ba aum media pengudah pengawa Nyerah Tugas entara Sapit Komander Briged PGA Sarawak ACP Zahari Ahmad ngagai Komander Briged PGA Sarawak ke baru, SAC Datuk Isa Munir ti mega digulu Sapit Kepala Polis, Datuk Law Hong Soon.
Zahari udah mangku pengawa nyadi Komander ari pun bulan Januari laban lebuh nya, komander sebedau nya, Datuk Wan Abdullah Tuanku Said pinchin kena 5 Februari tu tadi.
Isa sebedau tu mangku pengawa nyadi Komander Polis Marin dalam timpuh enam taun sebedau dipadu mangku pengawa nyadi Komander PGA Briged Sarawak.
Salleh madah, pengawa nya ila deka beratika batang pengawa dikereja enggau mujur kelimpah ari meri peluang ngenegapka agi penemu enggau fizikal raban.
Iya nambah, pengawa nya deka beratika pengelantang pendiau raban PGA dijaga lebih agi ngembuan palan ke besai endur begulai enggau sida sebilik.
“Tu entara tuju peminta PGA ke deka dianjung ngagai perintah besai ngambika sida iya ulih berundingka penegap PGA dikemeratka agi lalu kitai belabuh di Sabah enggau Sarawak,” ku iya.
Peminta nya ku iya, nyaut peminta Opis Menteri Pengintu Pengelikun Menua ngambika Sitak Pengelikun Khas Pantai Timur Sabah (ESSCOM) dikerembai ke Sarawak.
Seiti kompeni PGA Sarawak mega dianjung ngagai Sabah kena mantu operasyen nya.
Kelimpah ari nya, Salleh mega madah, penambah raban ‘khas’ nya di Sarawak deka mantu polis ngenegapka pengelikun di sitak ke patut lebih agi ba sitak ti dikemansangka alai struktur ekonomi baka di Koridor Kuasa Tau Dikena Baru Sarawak (SCORE) dipejalaika.
Beindik ari nya ku iya, perengka guna enggau logistik PGA mega deka ditambah.
Ba pekara bukai, Salleh madah proses meri nama baru PGA diatu benung dipejalai lalu minta orang mayuh ke bisi penemu pasal pekara tu mantu PGA ngaga perambu nya.
“Ila kami madah, enti udah tetemuka nama ke ngipakka penegap PGA, enggau lebih sinonim enggau pengawa sida ngambika muntang dikelala mensia mayuh, batang pengawa sida,” ku iya.
“Aku deka meda PGA tu tau dianjung ngagai barang alai sereta sebarang maya…Taja pan kami tu polis tang setengah soldadu,” ku iya.