SRI AMAN: Perintah nadai kala enda ngemeratka raban orang ti kurang benasit, ku Kaban Parlimen (MP) Sri Aman, Masir Kujat.
Ku iya, raban sida ti kurang bidik lansik tu mega enda patut ngasaika diri enda dikeibuhka ari mensia mayuh, laban sida endang bisi ungkup kediri.
“Perintah endang seruran ngemerat sereta siru ke raban tu, sida mega patut kering napi semua nya sereta nengah jalai pengidup baka selama,” ku iya.
Iya bejaku munyi tu ba atur Pengawa Bala Nembiak di Rumah Nembiak Datuk Ajibah Abol (RKKDAA), Sri Aman ba sebengkah hptel ditu empai lama ke udah.
Ku iya, barang sapa ti ngembuan kaban belayan ke timpang pendiau (OKU) patut ngerejister sida ba Opis Pengintu Pengelantang Raban Bansa (JKM) ngambi nerima bantu ke patut.
“Orang ke dalam raban tu enda patut berasai malu sereta ngemaruhka diri, tang patut ngerejister diri ba opis nya.
“Enti sema sida udah ngerejister diri enggau opis nya, sida ulih nerima sebarang bantu ke diberi JKM,” ku iya.
Mensia mayuh mega patut begempung enggau perintah nyaup raban nya sereta meri sukung ngambika sida seruran ngasaika diri dikemeratka.
Sama bisi ngulu pengerami nya, Direktor Opis Pengintu Pengelantang Raban Bansa (JKM) Sarawak, Abang Shamshuddin Abang Seruji, Sapit Direktor JKM Bagi Menua Sri Aman, Sharifah Ranimah Hashim, Sapit Residen Rama Bagi Menua Sri Aman, Hamdan Katang, Prinsipal RKKDAA, Nurul Illiana Alias, Menijar Pampang Bank Rakyat Sri Aman, Abdul Azis Rosli, Chairman Kunsil Temuai, Alhias Muhi, Kaunsilor Mostapha Tugo sereta ke bukai.
Beserimbai engau nya, seraban 17 iku bala nembiak ke nguan palan nya ti beumur 10 nyentuk ke 18 taun, udah diperindang nengah pengerami nya.
Nengah awak nya mega, Masir ngungkupka belanja RM5,000 ngagai RKKDAA Sri Aman ngambika bisi dikena bejalaika pengawa sepanjai taun.