KE PENGINGAT: Fatimah (tiga kiba) begambar begulai enggau raban Persatuan Lembaga-lembaga Pengurusan Sekolah-sekolah Rendah SJK Cina Bahagian Kuching Samarahan ti betuaika Liu (dua kiba), sama bisi Rosey (tiga kanan) enggau Freda (dua kanan).
KUCHING: Sekula primari peribit nengeri tu ti merambu deka numbuhka kelas prasekula dilalau ngerejister penumbuh kelas nya enggau Opis Pelajar Nengeri Sarawak (JPNS), ngambika bela ngasaika penguntung ti disediaka perintah.
Menteri Pengintu Pengelantang, Orang Indu enggau Pemansang Ruang Bilik, Datuk Fatimah Abdullah madah, sekula peribit ti ngerejister penumbuh prasekolah deka meri penguntung enggau pemanah ngagai kaunsil sekula, nembiak sereta apai indai.
“Sekula peribit ti deka numbuhka kelas prasekula enda tau enda ngerejister enggau JPNS, nya ke penguntung sereta pemanah piak kaunsil sekula, anak enggau apai indai.
“Dikena meransang mayuh agi sekula peribit numbuhka kelas prasekula di serata Malaysia, perintah bisi nyendiaka bantu iya nya Geran Pengepun penyampau RM10,000 ngagai RM20,000.
“Nambahka nya nembiak ti belajar ba prasekula peribit ti direjister, perintah berengkah ari taun 2010 nengah NKRA bisi mega nyendiaka sabsidi RM150 (ari RM75) sebulan ungkup seiku anak, nitihka penatai pemisi perkapita, ke tau dipinta apai indai nitihka atur ke udah ditetapka.
“Pengajar prasekula peribit ti direjister mega bisi penguntung, iya diberi latih sebaka enggau pengajar prasekula perintah,” ku iya.
Fatimah mansutka pekara nya maya aum pengarang berita lebuh nerima penemuai basa ari ‘Persatuan Lembaga-lembaga Pengurusan Sekolah SJK Cina’ Bahagian Kuching Samarahan ba opis iya di Baitulmakmur ditu, kemari.
Nitihku iya, apai indai ti teulihka penatai pemisi perkapita enda lebih RM300 sebulan, anak deka nerima sabsidi RM150 sebulan ungkup seiku anak; penatai pemisi perkapita enda lebih RM400 sebulan (sabsidi RM112.50 sebulan ungkup seiku anak) enggau penatai pemisi perkapita enda lebih RM500 sebulan dia anak deka nerima sabsidi RM75 sebulan.
Perintah ku iya, endang ngansak semua piak ti bekaul nyengkaum sekula peribit numbuhka kelas prasekula ngambika ulih nempa mayuh modal mensia ti bekualiti.
“Bepelasarka asil pansik bisi nunjukka penyulut nembiak bepun ari umur anak nya tiga ngagai empat taun, nya alai kitai bebendar deka ngenukuka anak kitai di Malaysia enggau naka pemayuh, ulih nerima pelajar tumu anak mit ti bekualiti.
“Nya kebuah perintah deka numbuhka mayuh agi prasekula nengah sekeda ejensi, lalu perintah mega meransang piak peribit begulai besaup enggau perintah (numbuhka kelas prasekula) ngambika mayuh agi anak mit teulihka pelajar tumu seraya nempa modal mensia bekualiti,” ku iya.
Ngenang penemuai Persatuan Lembaga-lembaga Pengurusan Sekolah-sekolah Rendah SJK Cina Bahagian Kuching Samarahan ti betuaika Chairman iya, Pemancha Liu Thian Leong, iya madah, bisi SJK Cina merambu deka numbuhka kelas prasekula taun 2015.
“Nitih penerang ke diterima, bisi lima buah sekula ti kena pegai Persatuan Lembaga-lembaga Pengurusan Sekolah-sekolah Rendah SJK Cina Bahagian Kuching Samarahan minta numbuhka kelas prasekula iya nya Chung Hua Buntal, Chung Hua Sg Tapang, SJK (C) St Paul, Green Road, Chung Hua Buda, enggau Chung Hua Sg Tengah.
“Dua buah sekula ti udah dikemandar iya nya Chuang Hua No.1 enggau Chung Hua Sg. Lubak,” ku iya seraya minta sekula peribit ti deka minta numbuhka kelas prasekula patut bekerejasama enggau JPNS nengah PPD (Opis Pelajar Pelilih Mit Menua).
Bepelasarka statistik dibantaika Fatimah kemari, naka bulan Februari 2014 penyampau prasekula/tabika/tadika nengeri Sarawak iya nya 2,703 buah sekula enggau penyampau 4,815 kelas sereta 78,514 iku nembiak sereta 4,900 iku pengajar.
“Ari penyampau nya bisi 383 buah tadika peribit direjister enggau JPNS ti bisi 1,697 kelas sereta 27,601 iku nembiak enggau 1,620 iku pengajar,” ku iya.
Sama bisi dalam aum pengarang berita nya kemari, Menteri Muda Pemansang Ruang Bilik enggau Pelajar Tumu Anak Mit , Rosey Yunus sereta Ketuai Sektor Pengurusan Sekolah JPNS, Freda Abdul Latif.