JABU
KUCHING: Sapit Kepala Menteri Datuk Patinggi Tan Sri Alfred Jabu Numpang ngangkatka SCORE, iya nya siti ari industri besai lebuh mantaika jaku iya di Forum Pengawa Dagang Sarawak-Republik Czech di Hotel Four Seasons di Praque, Republik Czech Hari Satu tu tadi.
“Aku deka bekunsi enggau kita peluang nanam puku di Samalaju Industrial Park dalam kandang sitak menua ti dipegai SCORE. ‘The Samalaju Industrial Park’ dikemansang nyadi palan kena industri intensif kuasa baka aluminium, manganese enggau stel, gelas (polycrystalline silicon enggau metallic silicon), sereta bepalanka minyak.
“Pemesai projek baka tu beguna endar laban sida iya nyadi pemerat nyukung industri di sitak nya. Enti Samalaju Industrial Park, ke digaga ba pemesai tanah 8,000 hektar, udah tembu endar ila, iya deka nyadi sitak industri pengabis besai di Malaysia,” ku Jabu madah lebuh bejaku ngarika Kepala Menteri Pehin Sri Abdul Taib Mahmud ti deka ngelengkaka pangku pengawa nyadi Kepala Menteri kena ujung bulan tu ila.
“Nyadi projek keterubah iya digaga di menua tu, Jabu madah Perintah Sarawak ngenyampatka pemansang Samalaju Industrial Park ke nyengkaum ungkup infrastruktur besai baka jalai ke disambung ngagai palan kuasa hidro, sebuah palan penyangkai, perengka guna bukai, perengka guna telekomunikasyen enggau mengeri baru.
“Samalaju Port ke digaga dalam kandang Samalaju Industrial Park pan benung digaga lalu dijangka tembu dalam taun 2016. Kediatu renggat sementara ke ulih nguan kapasiti 4 juta tan setaun udah tembu ke ulih nyukung industri ke udah dibuka diatu,” ku Jabu.
Iya madah pemansang ba Samalaju New Township ke digaga sepiak Samalaju Industrial Park pan benung digaga.
“Perengka guna tu dikemansangka ukai semina nyendiaka perengka guna kena orang ti betanamka puku tang beratika sida iya ngambika ulih diau enggau lantang di Sarawak,” ku iya.
Iya madah, taja pan mayuh ari pengawa nya benung digaga, pemisi Samalaju mujur narit ati raban orang betanamka puku ke besai.
“Diatu kami udah ngemendarka 14 projek enggau penyampau puku USD7.3 biliun lalu dipelaba deka nyendiaka urung 12,852 peluang pengawa puang.
“Ari puku tu, lapan udah belabuh dipejalaika. Dua buah kompeni, iya nya Tokuyama enggau Press Metal udah beoperasi,” ku Jabu.
“Kelimpah ari nanam puku di SCORE, kami ngelaluka raban ke betanamka puku ngambi peluang tu nanam puku di menua kami dalam pampang ekonomi baka pengawa betanam betupi komersil, enggau pengawa dagang temuai,” ku iya.
Forum Pengawa Dagang siti palan ke manah alai ngangkatka Sarawak mandangka menua sereta produk iya ngulihka peluang dagang ari menua luar nanam puku di meua tu, ku iya.
Ku tandu Jabu, Sarawak deka ngaul Republik Czech ngambika ulih ngaga kerejasama antara kompeni ari Sarawak.
“Aku ngarapka kita bisi ati lalu ulih nandu pengawa tu baru bekerejasama enggau Sarawak, udah abis Forum Pengawa Dagang tu ila. Dalam pekara tu, aku nyamin kita deka nerima sukung penuh ari Perintah Menua,” ku Jabu ti mega diberi basa bejadika forum pengawa dagang nya.
Naka kediatu, penyampau dagang ke udah digaga antara Republik Czech enggau Sarawak dalam taun 2012 bisi dalam RM2.5 milliun lalu mayuh agi nguntungka Republik Czech.
Penyampau dagang ke mit nyadi pemun sereta kerejasama ke manah dalam pekara dagang enggau nanam puku antara Sarawak enggau Republik Czech.