KUCHING: Belanja tambah penyampau RM1 billion kena ngemanahka tauka ngaga baru sekula ke udah tuai di Sarawak enggau Sabah endang patut berindik ari penyampau lebih 800 buah sekula ditu ti ngemeratka bantu nya.
Direktor Opis Pelajar Nengeri Srawak (JPNS), Datu Abdillah Adam madah, opis nya udah bisi lis sekula ke udah balat tuai ti begunaka besai belanja dikena ngemanah tauka ngaga baru mayuh rengka penyikap.
“Di Sarawak, enti sekula nya udah tuai endang disimpan kami dalam lis. Bisi urung 800 buah sekula ke begunaka bantu belanja tu,” ku iya madah maya aum media ditu, ensana.
Iya madah baka nya lebuh diasuh nimbal jaku Sapit Menteri Besai Tan Sri Muhyiddin Yassin ti mega Menteri Pelajar Malaysia bekaul enggau ungkup tambah RM1 billion kena ngemanahka sekula tuai di Sarawak enggau Sabah.
Muhyiddin madah, tebal sekula ke dikategori tuai bisi di kededua buah nengeri tu.
Taja pia, Abdillah madah, JPNS agi nganti renggat penudi tusun baru ke ngemendarka direktor opis pelajar renggat nengeri tau ngemendarka projek ke beungkus ari baruh RM5 juta.
“Perambu bansa tu begunaka orang gawa ke landik dalam teknikal mantu kitai ngaga perambu nya,” ku iya.
Kelimpah ari nya, Menteri Pengintu Pengelantang Pendiau, Pekara Indu enggau Pemansang Ruang Bilik Datuk Fatimah Abdullah madah, penambah belanja nya sigi berat ba Sarawak enggau Sabah laban beratika mayuh sekula ba kededua buah menua nya udah balat tuai.
“Mayuh sekula ditu kelia digaga chara besaup ngena perengka ke enda berapa lalu diatu nyangka enda likun agi, taja pia sekula nya nadai pilih bukai tang dikena belajar taja pan udah enda likun baka ke dipadahka Opis Kereja Raya (JKR),” ku iya.
Iya madah, atur ari KPM ti ngemendarka direktor Opis Pelajar Nengeri meri pemutus bejalaika projek ti beungkus kurang ari RM5 juta, singkang ti manah.
“Sebedau tu mayuh projek ‘sakit’ laban atur nya datai ari Perintah Besai. Diatu direktor nengeri udah diberi kuasa, pelaba aku penyampau sekula ‘sakit’ ulih dikurangka,” ku Fatimah.