Tu beduduk ari ungkus dikena ngaga rumah panjai begunaka puku besai, patut ditambah ari RM10,000 ngagai RM20,000
SIBU: Kaunsilor raban bansa Iban nyukung penemu Chairman Kunsil Penyanding Penemu 1Malaysia Sarawak (1MSAC) Datuk Joseph Salang Gandum ti ngarapka perintah ulih nambahka penyampau lun ngaga rumah panjai iya ke diatu diberi RM10,000 sepintu.
Kaunsilor Dr Ali Puji madah, iya pechaya orang rumah panjai ulih mayar lun nya laban sebedau tu mega sida ngeluarka puku ti besai enti deka ngentak baru.
“Aku nyukung bendar penemu tu laban pengawa ngentak rumah panjai bekenaka belanja tauka puku ti besai.
“Ambika banding perintah tau nambahka penyampau lun ari RM10,000 ngagai RM20,000 sepintu,” ku iya maya dikerandau pengarang berita, kemari.
Taja pan baka nya, ku Dr Ali, pekara tu mega mesti dipansik dulu kelebih agi bekaul enggau penatai pemisi rayat rumah panjai.
Penemu tu mega disukung Kaunsilor Pasang Ngelambai laban ku iya lun nya enda chukup dikena nembuka rumah baka ke semina ngudahka aja.
“Semua kereban dikena ngentak baru diatu udah niki magang.
“Baka batu-bata, suba semilan sen sigi tang diatu 35 sen sigi. Pia mega baka semin, suba RM12 sekambut lalu diatu urung RM17 ngagai RM18 sekambut.
“Nya alai, ba penemu aku, lun RM10,000 tu enda chukup dikena ngentak baru. Dikena nyeruri rumah baru pan enda chukup,” ku iya.
Ku Pasang, nambahka lun nya enda bangat ngerugika perintah enti dibida enggau Program Rumah Rayat Seranta (PPRT) ti bekenaka ungkus RM50,000 sebuah.
“Ketegal tu, aku ngarapka lun tu ulih ditambah agi laban kitai nangi enti RM10,000 projek nya enda tetembuka rumah lalu ngujungka rayat merinsa.
“Rumah enda tembu tang lun mengkang dibayar belama,” ku tandu iya.
Taja pan baka nya, ba penemu Kaunsilor Stephen Chendang, ari niki ke lun manah perintah berundingka chara baka ni ulih niki ke rega getah enggau lada.
“Manah perintah niki ke rega getah enggau lada laban tu meh jalai penatai pemisi rayat menua pesisir tauka rumah panjai.
“Ari tu sida ulih ngangkatka pengidup diri enggau lantang agi.
“Tang enti perintah deka nyaup rayat bebayarka lun rumah panjai, nadai ga salah,” pia ku penemu iya.
Maya ngulu Pengerami Mangkung Tiang ba Rumah Seli Nyambang di Nanga Lioh, Jalai Entabai/Julau kena ke 25 Januari tu tadi, Salang ngarapka perintah ulih nambahka penyampau lun ngaga rumah panjai iya ke diatu RM10,000 sepintu.
Kebuah pia ku iya, laban semua rega barang nyengkaum kereban enggau ramu dikena ngentak diatu niki rega magang.
Pekara nya empai dikira bebelika kereban ari kontraktor ke udah dipadu nyual kereban ngentak ke endang jauh agi mar.
Salang mega madah, orang ke nerima bantu lun tu enda mayuh lalu pengawa minta lun mega bekenaka awak ti lama sereta puku ti besai.
Pengerami mangkung tiang maya nya dipenyadika Menteri Pemansang Tanah Tan Sri James Jemut Masing.