SRI AMAN: Opis Pengerai (Unit Pengelikun enggau Kualiti Pemakai) Pelilih Sri Aman udah bejalaika pengawa meresa pemeresi ba palan bejual pemakai di pelilih Sri Aman enggau Lubok Antu apin lama ke udah.
Tukang pengerembai berita opis nya, Sebastian Vincent Majus madah, nengah operasi nya 23 iti palan bejualka pemakai udah diperesa ke alai sebuah ari nya udah dipinta tutup laban ke ngelanggar atur ari baruh Seksyen 11 Atur Pemakai 1983 enggau Atur Pemeresi Pemakai 2009.
“Palan bejual pemakai nya dipinta tutup ngambika meresi palan nya enggau lengkas dalam kandang 14 hari ari baruh Seksyen 11 Atur Pemakai 1983,” pia ku iya madah ngagai pemberita ditu, kemari.
Sama bela bisi enggau bejalaika operasi nya, Majlis Daerah Sri Aman (MDSA), Majlis Daerah Lubok Antu (MDLA) sereta Opis Menteri Dagang Dalam Nengeri, Koperasi enggau Pekara Bebeli Barang (KPDNKK) Pampang Sri Aman.
Operasi meresa pemeresi nya udah dipejalaika ba palan bas ngetu pasar Keranggas Gayau @ Lachau, R&R Temudok, Sri Aman enggau palan bas ngetu di Jelukong Engkilili, Lubok Antu.
Ku Sebastian baru, operasi nya dipejalai ngambika orang ti bejualka pemakai nya nitihka atur dalam Atur Pemakai 1983 enggau Atur Pemeresi Pemakai 2009.
Atur nya diungkupka kena nyaga pemeresi palan bejual pemakai sereta nentuka pemakai ti disediaka sida nya beresi lalu manah ke pengerai mensia mayuh.
“Enti sema sida enda tetitihka atur nya, orang ke ngempu palan bejual pemakai nya tau ditinggang ukum nitihka undang-undang ti udah ditetapka,” ku iya.