Nengah opis menteri nya, Sarawak ngerikodka penyampau 56,072 iku penerima bantu pengintu pengelantang pendiau
KUCHING: Taun 2013, nengeri tu ngerikodka penyampau 56,072 iku penerima bantu pengelantang pendiau ke mungkur pemayuh belanja RM164,177,135.
Menteri Pemansang Orang Indu, Ruang Bilik enggau Komuniti Datuk Seri Rohani Abdul Karim madah, ari penyampau nya 7,925 sida iya penerima di Kuching ke mungkur belanja RM19,869,625.
Ku iya, pekara tu mandangka perintah nengah opis menteri iya seruran ngemerat pengawa mantu raban orang ke kurang bepemisi.
“Opis menteri angkun nentuka pengelantang pendiau rayat diintu manah lalu meri bantu ngagai raban orang ke patut nerima bantu ba serata nengeri,” ku iya ba sebengkah aum pengarang berita pengudah nemuai ngagai Sepital Besai Sarawak (SGH) ditu, kemari.
Iya nambah, ungkup taun 2014 Opis Pengintu Pengelantang Raban Bansa (JKM) ngungkup belanja penyampau RM1.28 biliun di serata Malaysia.
“Ari penyampau semua belanja taun 2014 nya, Sarawak diungkupka RM45,932,000.
“Entara bantu ke deka diberi iya nya bantu ngagai nembiak, orang tuai, elawin orang gawa nyelai pendiau (OKU), bantu ngintu OKU, orang sakit raya sereta bantu ke bukai,’ku iya.
Ba kaul ke sama, Rohani muji pengawa JKM ke udah ngena ‘Sistem Semakan Status Penerima’ tiap tiga bulan enggau tuju ngempuru penerang orang nerima bantu.
Ku iya, sistem nya patut dikena ejensi perintah ke bukai di nengeri tu ngambika tau nyeliah peturun penerima bantu nya enda nerima bantu pengudah iya nadai.
“Semakan status’ tu chukup beguna ngambika ejensi tau nemu sekalika penerima nya agi idup tauka enda.
“Bisi kes udah nyadi ke alai penerima bantu udah mati tang bantu nya mengkang diberi,” ku iya.
Ngenang pekara bukai, Rohani madah tiga buah anjung kasih iya nya di SGH, Sepital Miri enggau Sepital Sibu dikearap ulih mantu orang ke kurang bepemisi berubat lama agi di sepital.
“Anjung Kasih di SGH pemadu besai di Malaysia ke ngembuan 90 buah katil.
“Anjung Kasih deka meri pengelantang ngagai orang ke kurang bepemisi lalu deka ditentuka sebengkah komiti ke dipilih tiap sepital,” ku iya.
Bela datai Direktor Opis Pengintu Pengelantang Raban Bansa Nengeri Sarawak (JKMNS) Abang Shamshudin Abang Seruji.