Anda di sini

Penuai kereban penyikap IPG Sarawak deka diputar jampat

Advertisement

MIRI: Opis Menteri Pela­jar Malaysia deka mutarka penanggul bangunan tuai ba Institut Pematih Pengajar (IPG) Kampus Sarawak ke kelalu balat repuk enggau naka pengelengkas.

Sapit Opis Menteri Pela­jar II, P.Kamalanathan P.Panchanathan madah, opis menteri nya deka ngiga chara ungkup timpuh ke lama kena mutarka penang­gul nya ke nyadi ketegal diempa sampuk.

“Kami deka ngelala status bangunan IPG nya sekalika dalam kategori sakit tauka kelalu tuai, seraya ngiga chara mutarka penanggul dalam timpuh ke lama nen­gah chara ke ngasi enggau naka pengelengkas,” ku iya lebuh nemuai seraya gawa ngagai IPG Kampus Sarawak Miri kemari.

Ku iya, bangunan nya udah dikena ngelui 30 taun ke alai balat endar rusak ba perabung, lantai enggau rumah endur pengajar diau ketegal diempa sampuk.

“Aku deka mantaika peka­ra tu ngambi dikerandauka silik agi ba opis menteri, sebedau kami ngaga pemu­tus sekalika deka ngemanah tauka ngaga baru bangunan ke udah kelalu tuai nya,” ku iya.

P.Kalamalanthan bejaku munyi tu lebuh nimbal se­nentang penanggul ke ditapi IPG Kampus Sarawak ditu.

Tu meh keterubah endar iya nemuai ke Miri seraya gawa ngelama lapan hari ke serata menua Malaysia. Nengah awak nya iya lalu beratika penanggul ke ditapi sekeda palan pematih pelajar di menua tu.

Dulu ari nya, Sapit Direk­tor IPG Kampus Sarawak Gumbang Pura madah, sida betapi enggau penanggul sampuk ti ngujungka sekeda bangunan enda dikena.

“Bangunan pra-sekula enggau gimnasium enda dikena laban ti enda likun dikena bala pelatih. Ung­kus kena ngemanahka lan­tai gimnasium dianggarka RM100,000,” pia ku iya.

Kelimpah ari nya, bangu­nan bukai baka flet endur pengereja pengawa diau, kuaters enggau berek mega balat endar udah rusak.

“Opis Kereja Raya (JKR) udah nganggarka ungkus ngerumpang flet Cempa­ka enggau Mawar urung RM400,000. Tambah mega flet nya enda likun agi endur diau,” ku iya.

Ku Gumbang sida bisi nerima ungkup belanja RM20,000 kena mutarka penanggul sampuk nya, tang belanja nya enda chukup.

Berebak enggau nya, sida mega betapi enggau pen­anggul deka ngambi pelatih baru laban ke kurang per­engkaguna sereta mega enda chukup pengereja pengawa.

“Kami enda ulih ngambi mayuh pelatih laban betapi enggau pengurang pereng­kaguna baka bilik licha, palan pelatih diau enggau sekeda kereban bukai,” tandu iya.

 

Advertisement