NGEMERAT PENGERAI: Bala pengereja pengawa nyembur rachun ba kandang endur berumah.
SIBU: Opis Pengerai Pelilih Sibu mujur ngatur ‘Enforcement Information Blast (E-Info Blast): Ops-Gempur Aedes Siri 2/2014’ apin lama ke udah dikena nyaga sereta munaska penyakit ke dibai vektor, lebih agi penyakit denggi.
Operasi nya dipejalaika di Rejang Park, Kampung Hilir, Kampung Dato, Jalai Tong Sang enggau Jalai Bukit Assek berengkah ari pukul 8.00 pagi.
Dalam penerang ke dipansut ditu, opis pengerai ngelalau mensia mayuh munas tauka numbak uras ke tau ngundan ai baka tayar, tung chat, tin puang enggau mangkuk sereta ti bukai.
“Semua utai ke ulih ngundan ai enda tau enda dilamun ngambika enda nyadi palan alai nyamuk betelu.
“Orang mayuh dilalau nguna ubat sapu ngambika enda kena gigit nyamuk lebuh sida pansut ari rumah, manchit rachun aerosol dalam rumah.
“Semua utai tumbuh ke tau alai nyamuk tu betelu enda tau enda dibuai,” ku penerang nya seraya nambah, nyema sida bisi renga anang enda jampat betemu enggau lutur.