NYULUT: Abang Johari (kiba) seraya dikemataka Eric (tengah)nyuaka skrol ngagai seiku graduate ba Pengerami Konvokesyen KLT kedua di Sibu, kemari.
Ulih dijapai nengah ngadaka nembiak rebak baru ti bepengelandik kelimpah bisi pengeraja asal enggau atur perambu ekonomi ke tegap
SIBU: Sarawak dikeandalka ulih nyadi menua maju sereta ngembuan rayat bepenatai pemisi tinggi manggai taun 2030.
Menteri Pengawa Berumah enggau Dagang Temuai, Datuk Amar Abang Johari Tun Abang Openg madah, nengah pengeraja asal enggau atur perambu ekonomi ke tegap dikearapka ulih ngemujurka kededua juluk nya.
“Pengabis beguna kena nyapai juluk nyadi nengeri maju sereta bepenatai pemisi tinggi, rayat enda tau enda ngemeratka pekara pelajar.
“Pekara pelajar tu ulih ngadaka pengereja pengawa ke landik ti ulih bekenaka pengeraja asal ngangkatka tikas ekonomi enggau nyungkakka penatai pemisi rayat.
“Enti nadai orang ke bepengelandik kitai enda ulih ngubah Sarawak jemah ila,” ku iya bejaku ba Pengerami Konvokesyen Kedua Kolej Laila Taib (KLT) ditu, kemari.
Sama bisi datai ba pengerami nya Sapit Menteri Pemansang Menua Pesisir enggau Kandang Menua Datuk Alexander Nanta Linggi, Menteri Muda Pengawa Berumah ke lalu nyadi Menteri Muda Pemansang Nembiak (Mengeri) Datuk Abdul Karim Hamzah, Sekretari Politik Kepala Menteri ke mega Kaban Kunsil Nengeri (ADUN) Samariang, Sharifah Hasidah Sayeed Aman Ghazali sereta Direktor Eksekutif Kristal Harta Sdn Bhd (Cats FM), Datuk Hanifah Taib Alsree.
Bisi datai mega Pemangku Ketuai Pemesai Eksekutif KLT Eric Wong, Residen Sibu Sim Kok Kee, Sapit Chairman Majlis Perbandaran Sibu (MPS) Datuk Andrew Wong, Panglima Infrantri 9 Briged Brigadier Jeneral Muhammad Daniel @ Damien Abdullah enggau Temenggung Vincent Lau.
Bisi 283 graduate diploma jurusan Seni Bina, Kejuruteraan Awam, Kejuruteraan Elektrik/Elektronik, Kuantiti Survei dan Pengurusan Perniagaan nerima diploma ke disuaka Abang Johari.
Karen Wong (Diploma Pengurusan Perniagaan) nerima ‘Anugerah Datuk Patinggi Laila Taib’ ke mega dipilih nembiak nyulut ba konvokesyen serak tu.
Graduate bukai Vincent Chin (Diploma Seni Bina), Ivan Hong (Diploma Kejuruteraan Awam), Derrick Ling (Diploma Kejuruteraan Elektrik/Elektronik), Vivien Lau (Diploma Kuantiti Survei) enggau Maria Wong (Diploma Pengurusan Perniagaan).
Abang Johari madah, semina pelajar aja ulih ngemansangka nengeri tu jemah ila.
Kelimpah ari nya mega, iya madah penumbuh KLT endang setipak bendar enggau pengerembai ekonomi ke diperambu perintah ngelamatu ke begunaka raban orang bepengelandik.
“Raban orang bepengelandik kelebih agi ari nembiak rebak baru endang dikedekaka perintah. Perintah udah merambu pemansang ekonomi kena nentuka nengeri tu nyapai juluk nyadi menua bepenatai pemisi tinggi.
“Bidang ke dipelajarka kita endang setipak enggau pengerembai ekonomi kena napi peminta nyadi menua industri ke majak mansang sereta begunaka raban orang bepengelandik.
“Guna meh awak ke udah disediaka ditu. Enti ulih tampung pelajar kita ngagai tikas ke tinggi agi tang ukai semina naka diploma aja,” ku iya.
Ku iya, enti ngembuan pelajar ke tinggi, nya mega ulih ngenataika penatai pemisi ke tinggi jemah ila.
Beduduk ari nya, iya ngelalau bala graduate semampai ngemeratka integriti sereta tikas disiplin tinggi maya begulai enggau mensia mayuh.
“Ingat meh, pelajar enggau penegap menua sereta kaul enggau pupu raban bansa ulih ngetanka menua tu majak likun endur diau.
Tandu iya, anang enggai bekunsika peneleba enggau penemu ngagai nengeri tu enggau naka alah.
“Menua ke likun ketegal kaul pupu raban bansa ke tegap. Nya alai, besaup meh kitai ngemansangka menua tu,” ku iya.