SARIKEI: Menteri Muda Perengkaguna Rama (bekal Lekterik enggau Penyambung), Datuk Stephen Rundi Utom, bejaku madahka nyerumba 2030, Sarawak deka nyadi sebuah nengeri pengabis kaya ari mayuh bengkah aspek di Malaysia.
Senipak enggau nya mayuh bengkah peluang ke tau mai penguntung ngagai rebak baru kelebih agi dalam begiga peluang gawa ngelangkar sesebengkah pengawa ke tau ngemuaska ati diri enggau nya deka meri empas ke manah ngagai bansa enggau menua.
“Diatu perintah udah nyendiaka mayuh bengkah peluang gawa enggau perengkaguna ngambika mantu nembiak nyadi penyungkak aba pemansang menua ke bekualiti tinggi, ulih besemekih di tikas nengeri, menua tauka antarabansa.
“Indah ari dulu suba nyentuk ke diatu aktiviti ke bepelasarka raban nembiak tu ngajar sereta ngadaka mudal mensia ke menyana ngambika ulih ngembing menua jemah ila,” ku iya.
Stephen bejaku munyi tu ba Atur Pengawa Ngelancharka Pusat Belia (Y-Centre) enggau Pengerami Nembiak Pelilih Sarikei, ke diatur di Dewan Suarah Sarikei, kemari.
Y-Centre nya sebuah pusat alai nembiak begempuru ke udah dibuka dalam pun taun tu lalu ditempatka di sebengkah palan ungkup tuju tu aja di serata Dewan Suarah di Sarawak.
Pusat tu deka disiksap enggau wi-fi, mini librari palan alai belelak sereta perengkguna bukai senipak enggau peneka nembiak.
Penumbuh Y-Centre nya sebengkah mekanisem ngambika meri penepan ngagai bala nembiak alai sida begulai sereta merambu enggau bejalaika aktiviti sida.
Pusat tu bepelasarka perambu deka dibuka tujuh hari dalam seminggu iya nya berengkah ari jam 8 pagi nyentuk ke 8 malam.
Dalam jaku ajar iya, Stephen nyemetak nyeru bala nembiak ngembuan timpai enggau tuju nyema deka mujur jemah ila.
Bela datai Sekretari Mendam, Opis Menteri Pemansang Rama Sarawak, Affandi Keli, Residen Pelilih Sarikei, Dahim Nadot, Chairman Opis Kaunsil Pelilih Sarikei, Chan Phan Chan sereta urung 500 iku bala nembiak.