Anda di sini

PR nyikap diri napi Pengawa Bepilih Mit DUN Balingian

Advertisement

KUCHING: Pakatan Rakyat Nengeri (PR) sedia nangkup Barisan Nasional (BN) di DUN Balingian enti pengawa bepilih mit diputus diadu ba sitak nya.

Chairman Parti Keadilan Rakyat (PKR) Sarawak Baru Bian (gambar) madah serakup penyakal udah bisi dua nama ke tau disabung enti amat pengawa bepilih mit deka diadu.

Iya ke ngulu aum Kunsil Ketuai Pakatan Rakyat Nengeri keterubah kemari netapka pekara nya bisi dipejurai enggau ketuai DAP sereta PAS ke alai sida setuju PR deka diarika chalun ari PKR.

“Enti pengawa bepilih mit diputus diadu ba Balingian, kitai setuju PR deka diarika chalun ari PKR.

“Pekara tu diputus bepelasarka pemereti raban ketuai ke alai ketetiga parti dalam serakup PR deka nempuh pengawa bepilih nya nengah semengat kerejasama.

“Sempekat tu mandangka kitai bebendar ngelaban BN nengah sukung ari rayat Sarawak,” ku iya ba siti aum pengarang berita pengudah ngulu aum nya kemari.

Baru ke mega ADUN Ba’Kelalan madah PKR udah bisi chalun lalu nama semina deka dibantai ba maya bukai ke diasaika ngena.

Ku iya, PKR bisi dua iku chalun ke tau disabung tang kitai bedau deka mantaika nama seiku entara seduai dulu ketegal pengawa bepilih mit bedau temu diadu tauka enda.

Ngenang senentang Kunsil Ketuai Pakatan Rakyat Nengeri ke baru ditumbuh, Baru madahka kunsil nya deka nyadi palan endur raban ketuai ari PKR, DAP enggau PAS bela duduk, bejurai sereta mutuska sekeda pekara ke bekaul enggau PR.

“Kunsil tu deka bejuraika pekara ba dalam PR lalu nya nyengkaum mutarka sekeda runding ke bebida ke dikembuan tetiap parti dalam serakup, mutarka sekeda penanggul tauka isu ke bisi ayan.

“Sebarang pekara ke nanggul disadang ulih diputar ba kunsil tu lalu kitai numbuhka kunsil tu bepelasarka peneleba ke udah ditempuh ngelamatu,” ku iya.

Nyaut tanya pemberita sekalika bisi bida ba jeman perintah Taib enggau Adenan udah tu ila, Baru nyaut “Enti kitai ngelaban seiku ketuai, kitai ngelaban sistem, polisi enggau agenda iya.”

Bela datai Chairman DAP Chong Chien Jen, Mandal chairman PKR Ali Biju, Sekretari PAS Sarawak Abang Ahmad Kerdee enggau ketuai bukai.

Advertisement