SRI AMAN: Pemujur ke dijapai ari sukut akademik, kokurikulum enggau lumba deka ngadaka mudal mensia ti bekualiti di menua tu, ku Menteri Muda Pemansang Menua Pesisir enggau Pengawa Berumah Datuk Francis Harden Hollis.
Nya alai, ku iya, runding apai indai patut berubah enti sema deka ke anak sida disengkaum dalam raban mudal mensia ke bekualiti nengah pemujur ari tiga pekara nya tadi.
“Perintah deka apai indai ngemeratka ketiga-tiga pekara tu ba anaka sida laban nya ulih ngadaka mudal mensia ti bekualiti di menua tu.
“Ketegal nya, aku enggai meda apai indai semina ngemeratka sieit asri tiga pekara nya,” ku iya.
Iya ke mega Kaban Kunsil Nengeri (ADUN) Simanggang madah munyi nya maya nutup pengerami Lumba Ninting Taun Sekolah Kebangsaan (SK) Abang Aing di Kompleks Sukan Sri Aman ditu, kemari.
Harden madah, perintah mega ngemeratka tiga pekara bukai iya nya pupu bansa, pengarap sereta adat enggau main asal ke ulih dijapai nengah sesebengkah aktiviti lumba enggau main ke ulih nyadi tiang pemansang menua.
Ketiga-tiga pekar tu, ku Harden, beguna amat diiri ngagai atlet lumba enggau main laban sida mega ulih ngangkatka nama manah menua nengah pekit ke diatur ba renggat antarabansa.
“Beduduk ari nya, beguna endar semua piak nyengkaum apai indai enggau pengajar ngemujurka sesebengkah aktiviti lumba ti enda ngelaungka pekara pupu bansa, pengarap enggau buday ba sekula diri empu.
“Semua tu mesti dipun ari renggat baruh ba raban nembiak sekula ngambika ulih tejapaika juluk nyadi menua maju ba taun 2020,” ku iya ke lalu ngerahka agih beungkus RM15,000 ngagai Gerempung Apai Indai enggau Pengajar (PIBG) sekula nya kena ngemujur aktiviti sekula sepemanjai taun tu.
Bisi datai ba pengerami nya, Pemesai Pelilih Mit Sri Aman Ismawie Salleh, Kepala Pengajar Wan Ismail Wan Chula, Chairman PIBG Zaidi Sarkawi enggau Pemancha Mas Shamsiah Maslem.