SRI AMAN: Kaban Kunsil Nengeri (ADUN) Engkilili, Dr Johnnical Rayong Ngipa (gambar) ngelalau nembiak sekula kelebih agi ba Sekolah Menengah Kerajaan (SMK) Engkilili ngambika belajar bebasaka bala pengajar ba endur sida besekula.
Ku iya, tu beguna amat nyadika bekal maya udah tuai ila ngambika semampai bebasaka orang bukai lalu nembiak sekula nya empu deka dipebasa mensia mayuh.
“Maya ba sekula kita patut bebasaka kepala pengajar, penulung kanan, bala pengajar ke bukai ba genturung pendiau tauka rumah panjai kelimpah bebasaka apai indai enggau mensia mayuh.
“Enti kita semampai ngemeranka ulah bebasaka orang bukai, aku pechaya dudi hari ila kita deka nyadi orang ke beguna kelimpah deka nampung nyadi ketuai ke dipebasa,” ku iya bejaku ba pengerami ‘Kejohanan Olahraga Balapan dan Padang’ SMK Engkilili ditu, bedau lama ke udah.
Pengerami nya dipejadika Kaban Parlimen Lubok Antu, William Nyalau Badak.
Pengerami sepengelama empat hari nya mandangka Rumah Undop mujur nyadi champian, lumur dua Batang Lupar, lumur tiga Marup lalu lumur empat Kumpang.
Kelimpah ari nya, Dr Rayong mega ngelalau nembiak sekula taja pan kiruh enggau pengawa lumba enggau main tang bidang akedemik enda patut dikelaung.
“Bidang akademik enggau aktiviti lumba patut sama dikemerat ke pemujur kita jemah ila,” ku iya.
Sama bisi datai Kepala Pengajar SMK Engkilili Ganis Abi, tiga kaunsilor Zainie Aji, Ah Han enggau Nyambong Maweng sereta raban pengajar ke bukai.