Anda di sini

Kes belaya seraban nembiak sekula udah diputar enggau manah

Advertisement

SIBU: Kes belaya seraban nembiak sekula ba sebuah sekula sekondari ditu udah mujur diputarka.

Tu nyengkaum ngelempaika atur displin ngagai nembiak ke bisi maruk diri dalam kes nya kelimpah nganggauka semua apai indai sida ngagai sekula.

Chairman Gerempung Apai Indai enggau Pengajar (PIBG), Danggang Ugik madah, piak iya baru aja tembu ngatur aum enggau piak sekula sereta bala apai indai nembiak sekula nya.

“Semua nembiak sekula ke maruk diri dalam kes tu udah ditinggang ukum disiplin nitihka atur undang-undang.

“Bala apai indai nembiak nya mega udah dikanggau ngagai sekula lalu diterang enggau silik bekaul enggau kes nya sereta gaya ukum ke dilempai kena nyeliahka sida ngambika enda saru penemu,” ku iya.

Ku Danggang, iya bebulaka tuduh ti madahka kes nya bisi kaul enggau pilih bansa.

Ku iya, tu tuduh ke berat lalu iya ngarapka apai indai nanya dulu bekaul enggau kes ngagai piak sekula enggau iya empu.

“Kes tu udah diputarka enggau manah lalu aku arapka nadai berita selebubu nangkanka tu.

“Tu (berita selebubu) ngenyaika nama manah sekula enggau apai indai nembiak nya empu,” ku iya.

Kelimpah ari nya, kes belaya nya semina malut sekeda nembiak sekula tang ukai bepuluh iku munyi ku padah berita selebubu nya.

Danggang madah, orang ke dipeda mayuh maya kes nya nyadi semina saksi aja lalu sida nguji deka ngerara nembiak ke belaya nya.

Tandu iya, kes tu dipelabaka bepun ari kelese seraban nembiak sekula ke manchal ngagai nembiak sekula ke bukai.

Ketegal enda puas ati, kelese nya nyau ngasuh nyadi laya.

Kes belaya nya nyadi urung pukul 10.45 pagi ba genturung sekula nya empu.

Advertisement