Anda di sini

Kaban MDLBS ke baru besemaya chakah gawa

Advertisement

SIBU: Kaban Opis Kaunsil Pelilih Mit Menua Pesisir Sibu (MDLBS) ke baru dipadu besemaya deka gawa bebendar ke rayat.

Kaunsilor Man Jelaieng maya dikerandau bedau lama ke udah madah, iya berasai tekenyit sereta enda nyangka diri dipadu nyadi kaunsilor opis kaunsil nya.

“Tu siti tanggungpengawa ke chukup berat kelimpah begunaka komitmen ke tinggi nyadi orang tengah di antara ijinsi perintah enggau raban bansa.

“Rayat diatu udah tuai runding lalu peminta sida majak tinggi. Nya alai, aku enggau naka alah bejalaika tanggungpengawa tu kelimpah nyaga nama manah MDLBS,” ku iya ke madahka diri berasai temegah ati ngagai perintah Barisan Nasional (BN) ketegal udah milih iya nyadi seiku ari kaban MDLBS.

Man ke gawa ngatika diri sebedau tu kala nelebaka diri nyadi pengajar sepengelama 10 taun.

Seiku da agi kaban MDLBS ke baru dipadu Kaunsilor Jimbau Galau mega sepenemu enggau Man deka gawa enggau chakah ke pengelantang rayat enggau penguntung perintah.

Ku Jimbau, agi mayuh atur pemansang patut dikerembai ba sitak iya di Durin.

“Pelaba aku, tu meh awak ke engkeman dikena aku ngemansang sereta nyungkakka tikas pendiau pengidup rayat kelebih agi ba pekara perengka guna.

“Aku mega ngarapka kaban MDLBS ke lama ulih ngembing kami sereta semampai ulih gawa enggau manah begulai enggau kaban MDLBS ke bukai,” ku iya ke seiku pinchin sedadu.

Apin lama ke udah maya Pengerami Angkat Sumpah Chairman enggau Sapit Chairman enggau Kaban MDLBS, Menteri Perintah Kandang Menua enggau Pemansang Raban Bansa Dato Sri Wong Soon Koh ngarapka komitmen ke tinggi ba raban kaunsilor.

Ku Wong, kaban opis kaunsil patut lebih kreatif bejalaika tanggungpengawa diri empu kena ngemujurka atur pengawa PBT ngagai raban bansa.

Wong ke mega Menteri Wang II madah, kaban PBT begunaka interaksi enggau rayat luar kena ngenegapka kaul tang ukai semina ba raban PBT aja.

“Ari nya, kita patut nemu nama utai dikedekaka rayat.

“Kita patut landik ngelala penanggul sida ngambika kita muntang gawa kelimpah ulih nyungkak tikas kualiti pengawa nyadi seiku kaban PBT,” ku iya.

Tandu Wong, kaban opis kaunsil ngembuan tanggungpengawa ke besai kena ngenegapka servis sesebengkah PBT.

Tu nyengkaum ngenukuka tetiap iku kaban opis kaunsil ngembuan perambu kena ngemujurka  aktiviti ke diatur.

Advertisement