BINTULU: Seraban 80 iku nembiak ari Sekula Primari (SK) Tatau udah nerima pemeri beg sekula enggau kereban kena nulis ari Opis Hal Ehwal Khas (JASA) Parlimen Selangau empai lama ke udah.
Bala nembiak ke nerima pemeri nya nyengkaum 15 iku nembiak primari tiga, 30 iku nembiak primari dua sereta 35 iku nembiak primari satu.
Pengerami nya udah dipenyadika Pemesai JASA Parlimen Selangau, Elisa Jaboh ngagai Kepala Pengajar SK Tatau, Janudin Ab Rahman sereta dibantu raban sekula nya Wilma Stanley Geramong enggau Priscillina Petrus.
Sama bela bisi dia maya nya Penulung Kanan 1 SK Tatau Hendry Lingak, Penulung Kanan Hal Ehwal Nembiak ke mega pengatur program Mohamad Salihin Talip, Penulung Kanan Kokurikulum Ngaliah Ason, Sekreteri Gerempung Apai Indai enggau Pengajar (PIBG), Jackson Nibang Amas sereta Tukang Wang, Shakila Mohd Nohrorawi.
Ku Janudin, bala nembiak ke dipilih nerima pemeri nya, bala nembiak ke seranta sereta bisi masuk ba Program Pemakai Tambah (RMT) ari sekula.
Ku iya, bala nembiak nya benasit laban ke dipilih nerima pemeri nya ari 879 iku nembiak di sekula nya.
“Aku arapka pemeri nya tau nyadika peransang ngagai sida ngambika chakah agi dalam pelajar sekula,” pia ku iya seraya meri terima kasih ngagai JASA.
Berebak enggau nya, Elisa madahka pemeri nya dipejalaika nengah Program Mantu Rayat (MEMBARA) Besekula Baru, kena nyaup apai indai ke seranta nyengulaka anak sida.
“Kami mega meri peransang ngagai bala nembiak ngambika ransing nurun ke sekula,” ku iya.
Ku iya baru, program nya mega dipejalaika ba 222 iti sitak Parlimen di serata menua Malaysia ke alai tiap iti Parlimen diungkup 200 set beg sekula.
Kelimpah ari SK Tatau, 50 set beg agi diberi ngagai Rumah Ngelayang Sekuau, Selangau lalu 70 set beg agi diungkupka ngagai Rumah Das Setapang, Selangau.