LUNDU: Sekula ke betapi enggau mayuh pengurang di Sabah enggau Sarawak deka diberi ungkup RM1 biliun lebih ari bajet asal ke udah dibantaika maya Bajet 2014 taun nyin tadi kena ngaga tauka ngemanahka agi infrastruktur sekula tu.
Urung enam ratus buah sekula ke betapi enggau pengurang infrastruktur ari sepuluh lebih ribu sekula di Malaysia, mayuh di Sabah enggau Sarawak.
Sapit Menteri Besai (TPM) Datuk Amar Tan Sri Muhyiddin Yassin madah enti nitihka audit fizikal ke digaga Opis Menteri Pelajar (KPM) dua taun ke udah, perintah deka ngemeratka sekula di Sabah enggau Sarawak dulu ke na mutarka pengurang nya.
“Mayuh ari sekula tu di Sabah enggau Sarawak dikelala perintah ke patut dikemeratka dulu.
“Semina naka kediatu, perintah begunaka timpuh sereta belanja lebih mimit laban enti deka ngemanah tauka ngaga sekula baru, sebuah sekula dijangka ngena belanja entara RM15juta-RM20 juta pengabis mimit,” ku iya madah lebuh bejaku ba aum media di Masjid Darul Taqwa ba Program Betemu Enggau Rayat di Lundu ditu, kemari.
“Kami udah ngelala ni bagi sekula ke patut digaga enggau jampat laban sekeda sekula nya, nyauka rubuh laban digaga ba tebing sungai, tauka kena tanah tusur lalu sekeda nya kelalu mayuh pengurang infrastruktur jke bukai.
“Tambah mega sekula tu agi diuan nembiak sekula, nya alai nangi ke pengelikun sida, perintah ngemeratka pekara tu sereta patut digaga enggau jampat,” ku iya.
Iya madah proses ngaga tauka ngemanahka sekula tu nyangka begunaka timpuh ke panjai laban enti nitihka atur teknikal, ambika chunto baka ngiga apak alai ngaga sekula baru.
“Taja pan udah bisi sekula, nyangka enda ulih dipindah ngagai endur baru, nya kebuah begunaka timpuh ke panjai mimit.
“Tang enti endur sekula nya agi manah, iya ulih digaga manah agi ba endur ke sama,” ku iya.
Muhyiddin ti mega nyadi Menteri Pelajar Malaysia madah, penanggul kedua iya nya, alai nganjung nembiak besekula ba endur bukai sementara nganti rumah sekula sida iya tembu patut diputar enggau manah.
Ba tanya bekaul enggau peminta di Sarawak kelebih agi di menua pesisir alai nembiak sekula ke diau di buding, lalu sida ke enda diau di buding betapi enggau penanggul nurun ke sekula laban rumah jauh ari sekula, pekara nya deka dikemeratka mega tang nitihka penyauh entara rumah enggau sekula nembiak.
“Tu siti ari pekara ke patut dikemeratka mega…Kami deka mansik dulu laban nembiak ke diau kelalu jauh, nyau bedarat nurun sekula. Perintah nengah KPM deka nyendiaka ungkup nya berenggat,” ku iya.
Taja pia iya madah, enti bisi kompeni peribit ke deka ngaga Tanggungpengawa Rama Korporat (CSR) sida, tau berunding ngaga buding alai nembiak sekula diau, lalu nya deka ngurangka belanja perintah, ku iya.
“Ambika chunto baka Astro ke ngemansangka endur diau nembiak sekula ke seranta di menua pesisir, enti bisi kompeni peribit ke ulih ngaga alai endur diau tu ulih ngurangka belanja printah,” ku iya.
Ba tanya Pengawa Bepilih Mit di sitak Balingian, enti sema kerusi nya puang (berindik ari penyandang kerusi nya, Kepala Menteri Pehin Sri Abdul Taib Mahmud ngelengka pangku pengawa Kepala Menteri) deka diatur seretai enggau Pengawa Bepilih Mit di Kajang (Selangor) bulan March tu ila, ku Muhyiddin:
“Aku enda nemu, bedau bisi sebarang penerang…Anti dulu meh ari Komiti Pengawa Bepilih (SPR), kitai enggai nyadi masuk champur. Penyakal pan anang nyangka sengapa,” ku iya lalu seraya madah enti bisi ubah dalam kabinet pan, nya barang ku Menteri Besai.
Nyempulang iya Sapit Kepala Menteri ke nyadi menteri pengiring Datuk Patinggi Tan Sri Alfred Jabu, Menteri di Opis Kepala Menteri (Menteri Tugas-tugas Khas, ti mega nyadi Kaban Parlimen Tanjung Datu, Tan Sri Datuk Amar Adenan Satem.