SPAOH: Perintah semampai ngemeratka konsep penyerakup ngambika rayat seruran bekerejasama, berakup sereta bebasaka pangan diri.
Menteri Muda Pengelantang Pendiau Sarawak, Robert Lawson Chuat madah, penyerakup bansa ke semampai dikemeran ngelamatu beguna amat kena ngenegapka atur pemansang ke pengelantang rayat.
“Asil penyerakup ke dikemeran ngelamatu, kitai ulih ngasaika pemansang di serata nengeri, kelimpah beempu menua ti likun ke ulih ngenegap politik di nengeri tu,” ku iya.
“Nya alai, rayat patut begempung enggau ketuai parti politik ukai semina kena ngenukuka menang maya pengawa bepilih, tang mega ngerembaika atur pemansang kelebih agi ba menua pesisir,” ku iya ke mega Kaban Kunsil Nengeri (ADUN) Bukit Saban madah ba pengerami ngabang Taun Baru China 2014 ke diatur Gerempung Chung Hua Spaoh, bedau lama ke udah.
Ku iya, rayat mega patut ngambi peluang ba semua perambu pemansang ke deka dipejalaika perintah nyengkaum ba renggat gerempung.
“Ambika chunto, tetiap gerempung enda tau enda bebendar nyapai juluk tang enda ulih ngelepaska tanggungpengawa mai bala kaban nyukung atur pemansang rama, ekonomi enggau utai bukai,” ku iya.
“Nyadi sebuah organisasyen dalam raban bansa, tetiap kaban enggau ketuai gerempung patut bekerejasama kelimpah semampai aktif ngaga perambu pemansang sereta ngerapatka kaul enggau perintah.
Sama datai ngulu program nya, Pemesai Pelilih Mit Betong, Friday Belik sereta bala tuai-tuai opis perintah.
Ba pengerami nya mega, bisi program nyuaka beg ngagai raban nembiak ngelingi Spaoh.