BINTANGOR: Orang berikan ba Rumah Suring, Sungai Tulai ditu ngarapka program bantu orang berikan ulih diserenih agi ngambika bantu nya disadung ngagai orang ke endang patut nerima bantu.
Tebal agi sida ba menua tu endang bepanggai pengidup ba pengawa berikan lalu randaka nerima bantu ari perintah.
Ben Adei, 44, madah sida berasai enda lantang ati ketegal pengawa meri bantu nya bisi nyelai disadung.
“Orang ke endang patut nerima bantu tu enda diberi bantu nyentukka sehari tu.
“Tang kitai alit ati nama kebuah orang ke enda gawa berikan tau bulih bantu tu,” ku iya maya berandau enggau pengarang berita kemari.
Ben madah, bantu nya diberi nengah e-Kasih lalu sekeda ari sida semenua udah nerima bantu ari program nya baka perau enggau injin sepit.
Iya mega madah udah kala diintebiu opis ti bekaul taun seiti nyin suba ketegal bantu nya tang nyentukka sehari tu empai nerima bantu.
Ku iya, nyangka enda semua rayat ke berikan ulih disangkung perintah magang tang sida ti bekaul patut ngaga sistem tauka chara ti nyemetak agi senentang pengawa milih sapa ke patut diberi.
Sepenemu enggau iya, Benet Bansa, 49, semampai ngandalka nerima bantu nya nyentukka sehari tu.
“Naka ke diatu kami bekenaka injin pam ai enggau perau kayu dikena berikan.
“Tang enti bisi saup perintah baka bantu perau enggau injin sepit kami ulih berikan jauh agi lalu asil berikan mega deka nambah ari ke sebedau tu,” pia ku iya madah.
Taja pan baka nya, ku iya, iya muji chara perintah mantu rayat ke bepanggai pengidup ba pengawa berikan.
“Tang nyema bantu nya enda diberi nitihka sapa ke patut nerima, pemanah perintah nadai mai penguntung ngagai rayat keba tau nejuka rayat ngembuan bemacham peragam ke enda manah,” ku iya.
Berindik ari pekara nya, Benet ngarapka pemesai ti dilempaika tanggungpengawa ulih mansik pekara tu.
Kelimpah ari seduai, Alexander Joseph, 24, ari Rumah Sap bela ari menua nya madahka iya empai kala nguji minta bantu nya sebedau tu tang nguji deka minta udah tu ila.
“Aku enda nemu agi ke enda bantu tu diberi. Tang baka aku ke ari biak gawa berikan andal bendar nerima bantu baka tu.
“Tang aku nangi bendar bantu tu enda terentuk ba tuju nyema sistem tauka chara agi baka ke dulu tang tu ukai reti kitai nyalahka perintah,” ku iya sambil madah bantu bukai baka empang, jala, pukat tauka kereban bukai tau mega disempulang enggau bantu nya.
Ku iya, orang berikan maya hari tu enda ulih ngandalka chara lama nyerumba rega barang ke majak niki ari taun seiti ngagai taun seiti.
Nya alai, iya madah rayat ke bepenatai pemisi mit baka orang gawa berikan sungai randaka saup perintah ngelempungka tating pengidup sida.