LUNDU: Sapit Menteri Besai (TPM) Tan Sri Muhyiddin Yassin (gambar) enda lantang ati enggau ulah penyakal bemain isu rega barang niki.
Iya madah nadai menua dalam dunya baka Malaysia nyekat rega barang laban deka nyaga hak mensia mayuh tauka penguna.
“Nyangka utai bansa tu enda mayuh ditemu rayat laban penyakal bemain enggau isu baka tu, madahka perintah enda ibuhka penusah rayat betapi enggau peniki rega barang.
“Enti utai ke manah, kala ke enda penyakal muji?
“Perintah ari suba udah mantu enggau mayuh macham chara ngurangka penusah rayat nengah Akta Kawalan 1946,” ku iya.
Iya madah perintah sigi enda ulih netapka rega barang tang perintah bisi chara iya nya ngena chara bukai ngurangka penusah rayat nengah undang-undang nya kelebih agi maya musim pengerami hari besai.
“Perintah ngaga Indeks Rega Penguna laban deka nemu trend rega barang lalu Menteri Pengawa Dagang Dalam Menua, Koperasi engggau Pekara Bebeli Barang ngeriput ngagai aku ninting bulan.
“Kami mansik rega barang di pasar nengah riput ke diberi tu kelebih agi enti bisi turun tauka niki rega barang nya,” ku iya.
Berindik ari nya ku Muhyiddin, rayat enda patut besalahka perintah ketegal rega barang niki.
“Mayuh rega barang udah diberi sabsidi baka gula, tepung, susu, beras nyengkaum minyak diesel,” ku iya.
Berebak enggau nya mega, Muhyiddin madahka perintah deka terus ngemeratka pemansang di menua pesisir.
“Tetiap pemansang ke digaga sebaka enggau di mengeri. Perintah tetap ngemeratka pemansang di kededua sitak tu kelebih agi di menua pesisir.
“Nama kebuah perintah terus ngemeratka pemansang menua pesisir? Laban peranak menua pesisir enda begilik nyukung perintah BN,” ku iya.
Sebedau nya, Sapit Kepala Menteri ti mega nyadi Menteri Pemansang Menua Pesisir Datuk Patinggi Tan Sri Alfred Jabu anak Numpang minta Perintah Besai nambahka mayuh agi bajet kena ngemansangka menua pesisir.
Iya madah perambu nya beguna amat ngambika rayat menua pesisir enda tinggal ari atur pemansang kelebih agi dalam pekara infrastruktur baka jalai alun, ai enggau karan.
Ku Jabu, ninting taun perintah besai enda kala enda meri ungkup ke Sarawak enggau Sabah, lalu ngarapka kerejasama bansa tu deka terus ditanka belama.
Kelimpah ari nya, Jabu ti mega nyadi Sapit Presiden Parti Pesaka Bumiputera Bersatu (PBB) nyamin parti komponen Barisan Nasional (BN) di Sarawak deka terus beserakup beratika menua tu mengkang nyadi kubu tegut BN.
Iya mega madahka atur maduka Adenan nyadi Kepala Menteri ke-5 dikearap ulih nampung pemujur Kepala Menteri Pehin Sri Abdul Taib Mahmud kelebih agi dalam pekara politik enggau penyerakup pupu bansa.
“Aku pechaya Adenan ulih nampung pengawa ke ditinggalka Taib ngemansangka menua tu dalam tiap sukut,” ku iya.
Ba atur pengawa nya mega, Muhyiddin nyuaka bantu RM1 juta ngaga SK Bumiputera Lundu kena sida iya ngemanahka sekula nya.
Sama bisi datai ba pengawa nya kemari Menteri di Opis Menteri Besai (Pekara Undang-undang) Nancy Shukri, Menteri di Opis Kepala Menteri (Menteri Tugas-tugas Khas) ti mega nyadi ADUN Tanjung Datu Tan Sri Datuk Amar Adenan Satem enggau Sapit Menteri Dalam Menua Datuk Wan Junaidi Tuanku Jaafar.