SERIAN: Polis kemari udah nangkap seiku lelaki ngambika mantu tasat bekaul enggau kes pemati seiku lelaki ketegal kena timbak di sebuah ladang sawit di Melikin ditu, bedau lama ke udah.
Kepala Polis Pelilih Serian DSP Mohd Jamali Umi madah, saspek umur 62 taun nya ditangkap di rumah iya di Kampung Tanah Mawang beserimbai enggau Ops Cantas, urung pukul 10.50 malam kemari.
“Lelaki nya ditangkap ngambika mantu tasat bekaul enggau kes pemati seiku pengereja pengawa sebuah kompeni ladang sawit ke parai tegal kena timbak di pala enggau dada, Hari Tiga tu tadi.
“Lebuh ke nangkap iya , rumah lelaki nya bisi kena peresa tang nadai pengawa berampaska utai bisi nyadi,” ku iya.
Ku iya, saspek diatu ditan riman sepengelama empat hari lalu ditasat di baruh Seksyen 302 Kanun Keseksaan.
Urung tengah hari Hari Tiga tu tadi, tiga iku pekereja serikat ladang sawit nya nyengkaum seiku penulung menijer besai ditimbak dipechaya ngena senapang patah dalam pejalai ngagai opis sida ngena sebuah pikap Toyota Hilux.
Dalam penyadi nya, John Wong Toh Kiong, 46, ke benung deriba pikap parai kena timbak ba mua enggau dada, dua iku agi bakal di dada sereta jari.
Ku penerang, kenyau ari taun nyin tadi peranak genturung pendiau di Melikin bedawaka tanah adat sida ditujah ngujungka sida nyadi mansa penyati enggau gap samseng ke didawa kena upah kompeni ladang.
Kelimpah ari nya, sida mega nuduh polis nadai ngambi atur ba riput polis ke digaga sida, tang nya disangkal Jamali dalam sebengkah media dalam bulan November taun nyin tadi.
Ku Jamali, sida bisi ngadu abas kenyit kena 30 September ke alai beberapa senyata ke tau munuh nyengkaum senapang enggau seterum udah dirampas ari kuarters pekereja di ladang sawit di Balai Ringin.