KUCHING: Opis Dagang Dalam Nengeri, Koperasi enggau Pekara Bebeli Barang (PDNKK) Sarawak ngerikutka 43 kes orang dagang enda nitihka atur Skim Sekat Rega Maya Hari Besai Tahun Baru China ti dipejalaika kenyau 26 Januari ngagai 9 Februari 2014.
Menteri KPDNKK Datuk Seri Hasan Malek madahka sepemanjai timpuh nya sepenyampau 7,478 premis udah diperesa lalu 43 kes nya ngerikodka rega barang dirampas RM2,674.75.
“Sepemanjai timpuh Skim Sekat Rega Maya Hari Besai Tahun Baru China apin lama, 43 kes dirikod di Sarawak sereta deka ditinggang ukum laban enda ngengkahka tanda rega kalas.
“Tu ngerikodka rega barang ti dirampas RM2,674.75, lalu penyampau kompaun iya nya RM4,400,” ku iya ngagai pengarang berita pengudah nemuai seraya meresa rega barang di Pasar Komuniti Stutong, ditu kemari.
Kelimpah ari nya ku iya, naka Hari Tiga tu tadi (12 Februari 2014) 101 kes ditinggang ukum pengudah Ops Harga 2014 dipenyadi kena 20 Januari 2014 enggau penyampau rega barang dirampas RM13,573.40 lalu kompaun RM6,700.
Iya madahka kes nya bekaul enggau beberapa akta di Sarawak bisi nunjukka pengusut iya nya Akta Kawalan Harga enggau Anti Pencatutan 2011.
“Tu nunjukka orang dagang udah berengkah meri kerejasama ngengkahka tanda rega, nitihka rega ti udah ditetapka enggau ngena sukat enggau penimbang ti betul,” ku iya.
Ngenang penemuai ngagai Pasar Komuniti Stutong, Hasan madahka diri puas ati ngagai ulah orang dagang ti ngenagkahka tanda rega ba barang ti dijual.
Iya mega temgah ati ngagai tikas pemeresi enggau tusun gerai lalu madahka pasar basah ti patut dichunto pasar basah bukai di Malaysia.
“Aku puas ati mega gawa pasar tu, kitai temegah ati ngagai pemesai Majlis Bandaraya Kuching Utara (MBKS) laban ti seruran ngenukuka endur ditu beresi enggau ditusun manah,” ku iya.
Nyempulang Hasan, Sapit Menteri KPDNKK Datuk Seri Ahmad Bashah Md. Hanipah, Ketua Setiausaha KPDNKK Datuk Seri Alias Ahmad enggau Direktor PDNKK Sarawak Stanley Tan.