KUCHING: Tan Sri Datuk Amar Adenan Satem ke deka mangku pengawa nyadi Kepala Menteri (KM) baru ke sah, berebak enggau nya, nadai mega penemu ke madahka iya deka mangku pengawa nya ungkup timpuh ke pandak.
Sapit Presiden II Parti Pesaka Bumiputera Bersatu (PBB) Datuk Amar Abang Johari Tun Abang Openg (gambar) madah, Kepala Menteri Pehin Sri Abdul Taib Mahmud udah ngeletak pemutus nyiri Adenan nengah kuasa ke diberi kaukus PBB.
“Nadai penemu madahka Adenan deka mangku pengawa nyadi kepala menteri ungkup timpuh ke pandak.
“Iya meh ke nyadi kepala menteri baru ke dipadu Taib lalu deka nyadi kepala menteri Sarawak,” ku Abang Johari nyaut tanya pengarang berita kemari.
Kitai patut meri kepala menteri ke baru awak nelebaka diri enggau pangku pengawa ke baru ke alai semua raban enggau ketuai dalam parti sereta Barisan Nasional (BN) dipinta meri kerejasama enggau sukung, tandu iya.
Abang Johari nambah, sebedau Taib mantaika nama ketuai ti deka nganti iya, iya dulu betanya sereta bekunsi penemu enggau sida tiga Adenan sereta Datuk Amar Awang Tengah Ali Hassan.
“Taib bisi betanya kelimpah ti nerangka sekeda pekara ngagai aku. Iya mega bisi ngadu pekara ke sama enggau Adenan sereta Awang Tengah.
“Maya nya, aku besemaya ngagai Taib dia aku deka meri sukung ke pengabis besai lalu pia mega kededua Adenan enggau Awang tengah.
“Aku, Adenan enggau Awang Tengah deka nyukung sapa aja ke dipilih Taib nyadi kepala menteri iya nya entara kami tiga,” ku iya.
Nyaut tanya pemberita sekalika bisi ubah ba rintai kabinet menteri udah tu ila, Abang Johari madah semua nya dilempaika ngagai kepala menteri ke baru lalu sebarang pemutus tetap deka dipebasa.