BINTANGOR: Berindik ari nama Menteri Pekara Khas ba Opis Kepala Menteri Tan Sri Datuk Adenan Satem dipadu mangku pengawa nyadi Kepala Menteri (KM) ke baru, ba dini-dini alai baik nya ba laman rama tauka ba sebelah kedai kupi nyengkaum rumah panjai, rayat enda betikas umur bela ngenang pekara baru nya.
Tang taja pan baka nya tebal agi nyukung pemutus Pehin Sri Abdul Taib Mahmud ti deka nyirika Adenan nganti penuduk iya megai nengeri tu.
Pemancha Benjamin Legak mega maya dikerandau pengarang berita kemari madahka rayat di pelilih mit Bintangor nyambut manah pemutus Taib nya.
Ku iya, pemutus nya nadai tentu nerima bantah ari rayat nyengkaum bansa bukai baka raban bansa Iban.
“Kami bansa Iban ngembuan pengarap ke besai ngagai Kepala Menteri baru ulih nyungkakka agi pengidup raban bansa kami udah iya mangku pengawa nya.
“Tang taja pan baka nya aku enda madah perintah sebedau tu bechiping magi pemansang tang pungka meri besai terima kasih ngagai Taib ketegal ulih nyadi ketuai ti manah ngemansangka nengeri tu baka ke dipeda kitai sehari tu,” pia ku iya madah.
Benjamin mega madah, sida enda ngadang pemutus baka nya digaga.
Tang ku iya, iya pechaya Taib seiku pemesai ti landik milih sapa ke patut sereta bepenau nganti penuduk iya nandu pemansang nengeri tu nyentukka ila.
Nambahka nya, Benjamin mega madah rayat baka ba pelilih mit Bintangor ngarapka Kepala Menteri baru nya ulih merening agipengidup rayat ba menua pesisir.
“Kitai enda nyalam agi jauh tinggal pemansang ari orang bukai.
“Ari nya, kitai andal bendar pekara baru tu tau nempa ubah ke manah agi ba pemansang pengidup raban bansa Iban,” ku iya madahka baru.
Kelimpah Benjamin, seiku Komiti Opis Kunsil Menua Pesisir Sibu (SRDC) Kaunsilor Andrewson Ngalai bela madahka, pemutus nya engkeman digaga laban iya pechaya Adenan ulih nandu pelin pemansang nengeri tu nengah rintis jalai ke udah dirandang Taib suba.
“Adenan seiku pemesai ti ngembuan penemu enggau penelaba ti mayuh.
“Iya udah teleba nyadi pemesai baikka ba renggat nengeri tauka renggat perintah besai.
“Nya kebuah, iya endang patut dichiri mangku pengawa nyadi Kepala Menteri Sarawak ke baru,” pia ku iya madah.
Ku iya, rayat menua pesisir andal bendar Adenan ulih megai tanggungpengawa nya ngambika pemansang ulih diatur belama ba nengeri tu.
“Kitai mega meri besai terima kasih ngagai budi enggau pemendar Taib ke udah ngemansang ke nengeri tu taja kitai nemu sekumbang 33 taun megai perintah Sarawak iya napi macham penguji.
“Kitai anang enda ingat semua tu laban ari iya kitai ulih ngasaika pemansang baka ke maya hari tu,” ku iya madahka baru.