KUCHING: Sapit Kepala Menteri (SKM) Datuk Patinggi Tan Sri Alfred Jabu anak Numpang enggai nimbal tanya media bekaul enggau penuduk iya nyadi sapit kepala menteri enti sema iya (Jabu) deka nitihka singkang Kepala Menteri ke diatu, Pehin Sri Abdul Taib Mahmud ngelengka penuduk nya.
“Nadai komen,” ku iya madah lebuh dikerandau tembu nyempulang Sapit Menteri Besai Tan Sri Datuk Patinggi Muhyiddin Yassin ngagai hotel alai Muhyiddin diau ditu, kemari.
Jabu ti mega Sapit Presiden Parti Pesaka Bumiputera Bersatu (PBB), entara pemesai ke udah lama gawa ari baruh Taib.
Jabu dipadu mangku pengawa nyadi Sapit Kepala Menteri ari taun 1974 udah iya menang ba pengawa bepilih besai menua ba kerusi DUN Layar lalu datai ke seharitu, agi mengkang ngetanka kerusi nya.
Hari Tiga tu tadi, Taib udah netap ngelengkaka pangku pengawa iya nyadi Kepala Menteri belabuh ari 28 Februari tu ila, udah iya nyuaka surat ngelengkaka pengawa Kepala Menteri ngagai Tuai Pemegai Menua Yang Dipertua Negeri Tun Abang Muhammad Salahuddin Abang Barieng.
Ba aum media pengudah pengawa nya, Taib lalu madahka nama Kepala Menteri baru ke deka nganti penuduk iya, iya nya Menteri di Opis Kepala Menteri (Tugas-Tugas Khas) ti mega nyadi ADUN Tanjung Datu, Tan Sri Datuk Amar Adenan Satem.