KUCHING: Sapit Menteri Besai, Tan Sri Muhyiddin Yassin malam ensanus bisi baum betambit pintu enggau raban presiden parti komponen Barisan Nasional Sarawak ba sebengkah hotel ditu.
Tuju aum nya dipelaba berandauka gaya pemansang politik di Sarawak diatu.
Bisi ngulu aum nya kemari, Kepala Menteri ti mega Chairman Barisan Nasional Nengeri enggau Presiden Parti Pesaka Bumiputera Bersatu (PBB) Pehin Sri Abdul Taib Mahmud, Sapit Kepala Menteri ti mega Naib Presiden PBB Datuk Patinggi Tan Sri Alfred Jabu Numpang, Presiden Parti Rakyat Sarawak (PRS) Tan Sri Datuk Amar James Jemut Masing, Presiden Parti Demokratik Progresif Sarawak (SPDP) Tan Sri William Mawan.
Nambahka nya, Sekretari Besai Parti Pesaka Bumiputera Bersatu (PBB) Datuk Dr. Stephen Rundi, lalu Parti Rayat Sa’ati Sarawak (SUPP) diarika Sekretari Besai parti nya, Prof. Dr. Sim Kui Hian.
Aum nya malam ensanus berengkah diatur ari pukul 7.50 malam.
Seharitu, Muhyiddin ti mega Menteri Pelajar Malaysia bisi program Pemesai Begulai enggau Rayat di sitak Parlimen Santubong /Kunsil Nengeri Tanjung Datu ti diatur ba SMK Lundu.
Kelimpah ari nya, iya mega bisi besembiang Hari Lima (solat) lalu ditangkan Majlis Kenduri Rakyat di Masjid Darul Taqwa.